Por E.P. | SANTIAGO DE COMPOSTELA | 13/07/2018 | Actualizada ás 14:51
O deputado de En Marea e portavoz nacional de Anova, Antón Sánchez, ve "positiva" e "construtiva" a proposta de Compostela Aberta para a reconfiguración do proxecto político de En Marea, xa que, para Sánchez, a proposición busca "integrar as sensibilidades necesarias para ser a alternativa verdadeira ao PP".
Anova é un dos partidos chamados a participar na "mesa da confluencia" que expón o documento aprobado en asemblea pola formación que lidera o alcalde compostelán, Martiño Noriega; un dos fundadores do partido nacionalista en 2012 e portavoz da formación até o ano pasado, cando Antón Sánchez asumiu o cargo.
Así, Anova confirmará este sábado na reunión da súa coordinadora se recolle a luva lanzada por Compostela Aberta para formar parte da devandita mesa, na que o partido nacionalista estaría acompañado polos seus socios na primeira coalición --EU e Podemos-- e as mareas de Santiago, A Coruña e Ferrol.
"Vémolo como algo positivo e necesario", declarou este venres Antón Sánchez ás preguntas dos medios nunha rolda de prensa celebrada no Parlamento, onde, no entanto, emprazou á decisión que tome o órgano de dirección de Anova.
Así, Sánchez sinalou que, a nivel persoal, cre "positivo" o movemento de Compostela Aberta porque entende que parte da "vontade para construír ese suxeito de unidade popular que ten que ser plural e diverso".
"INTEGRAR SENSIBILIDADES"
Para Sánchez, viceportavoz do Grupo Parlamentario de En Marea e que xa mostrou anteriormente o seu descontento pola configuración dos órganos de dirección do partido instrumental e algunhas das súas decisións, é preciso "integrar as sensibilidades que son necesarias para ser a alternativa verdadeira ao PP".
"Non se trata de cuestións internas, trátase de ser capaces de construír coa suficiente forza este suxeito para ser alternativa ao PP, que foi a idea que sempre defendemos neste espazo e que levamos defendendo seis anos", remarcou. A continuación, sinalou ás mareas municipalistas como exemplo da "integración da pluralidade" que cre precisa para "derrotar ao PP", como sucedeu nas eleccións locais do ano 2015.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.