Emilio Cao: "a miña condena xudicial non vai facer que me arrugue"

Atrás quedan catro anos de "incertidume" e "desamparo" que lle imposibilitaron realizar unha vida normal, asegura Emilio Cao. Dende aquel 22 de marzo do 2014 en que o rapaz foi detido en Madrid por participar nas marchas da dignidade acusado de desordes públicas, Cao viviu "unha mala experiencia" da que, segundo di, non se arrepinte.

Ata finais do mes pasado, a Fiscalía mantivo a petición da pena de cinco anos e oito meses de prisión, ademais de 600 euros de multa. Pero a sentenza que finalmente se lle impuxo ao mozo foi a de tres meses de cadea e 200 € de multa, polo que non entrará en prisión. Emilio Cao afirma que celebrou a noticia, mais "o idóneo sería a libre ansolución", xa que considera que non cometeu ningún atentado contra a autoridade, tal como ditaron os xueces. 

"Unha montaxe policial". Así é como entende Cao todo este proceso do que saca unha moralexa clara: "a intención de reprimir a protesta social" e de activar unha "docilidade" que, asegura, "non vai acatar". Así mesmo, o mozo quixo mostrar unha vez máis o seu agradecemento ás persoas involucradas, entre as que citou a Lores, Jorge Suárez, Xulio Ferreiro, Martiño Noriega, ao grupo parlamentar En Marea e a Pepe Arias, un dos artífices do éxito da campaña de amnistía, asegurou. Despois de todo, Emilio Cao segue con forzas: "A loita vai seguir, isto non vai facer que me arrugue".