Por E.P. | SANTIAGO DE COMPOSTELA | 24/08/2018 | Actualizada ás 14:55
O persoal de Seaga, empresa pública de loita contra o lume, irá á folga se a Xunta non ten en conta a súa experiencia na puntuación de cara ao proceso de reestruturación que o Goberno galego prevé realizar no servizo antincendios.
En rolda de prensa en Santiago este venres, o presidente do comité de empresa Pontevedra, Josafat Ponte, explicou que a experiencia de "máis de 10 anos" dos traballadores de Seaga non puntúa para as listas da futura reestruturación do servizo contra o lume, xa que "só puntúan os traballadores da Xunta e dos concellos".
Por iso, o presidente do comité de empresa de Seaga na Coruña, Peter Brea, demandou á Xunta que explique "como vai ser o proceso de reestruturación e o proceso de puntuación" dos traballadores da loita contra o lume. Após unha primeira reunión con Función Pública, estes empregados enviaron dúas peticións para un novo encontro sen resposta. Así, se a semana que vén non contan cunha contestación do Goberno galego procederán a "tomar cartas no asunto" con mobilizacións, que dará lugar, "se non hai visos de saída", a unha folga, explica Brea.
INCERTEZA SOBRE A REESTRUTURACIÓN E SEAGA
E é que estes traballadores din descoñecer en que consistirá a reestruturación do servizo que prevé a Xunta para unha mellor coordinación e se Seaga seguirá existindo en 2019, porque non saben "nada máis". Respecto diso, os traballadores de Seaga --que conta cuns 500 empregados-- non ven "nin medianamente normal" que se poida "desperdiciar" a bagaxe humana e técnica destes brigadistas.
Ademais, lembran que Seaga é unha empresa "cento por cento" pública, da cal a conselleira de Medio Rural, Ángeles Vázquez, é a súa "presidenta". Con todo, os traballadores están "sen convenio" e como fixos descontinuos contratados durante uns meses ao ano non contan cos mesmos dereitos que o resto de traballadores da Xunta, cun salario basee duns 770 euros ao mes.
FRANXAS DE PROTECCIÓN
Ademais, os traballadores de Seaga tamén mostraron o seu malestar polo convenio entre a Xunta e a Federación Galega de Municipios e Provincias (Fegamp) para a limpeza de franxas secundarias --ao redor de casas e núcleos--, xa que non teñen "nin idea" de en que vai consistir, a pesar de que se prevé que os traballos comecen a partir de setembro.
"Os traballadores de incendios non somos traballadores de obra", explicou Josafat Ponte, quen indica que, por exemplo, na súa categoría destinada á extinción de incendios non se contempla que se dedique a eses traballos de obra, polo que se pregunta "que pensan facer" e como se executará ese convenio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.