Por Galicia Confidencial | Barcelona | 11/09/2018 | Actualizada ás 18:25
Delegacións do BNG e de Compromiso por Galicia (CxG) estiveron presentes este martes nos actos organizados polas formacións nacionalistas e independentistas catalanas a favor da soberanía e dunha República catalana.
O BNG participou cunha delegación integrada polo responsable de Organización, Bieito Lobeira, e polos cargos políticos responsables da coordinación da Área de Internacional, Ana Miranda e Rubén Cela.
“Con esta participación, xunto con militantes da formación nacionalista na emigración, o Bloque volve evidenciar o seu total apoio ao dereito do pobo catalán para decidir libremente e con todas as garantías a súa relación co Estado español, a través dun referendo de autodeterminación”, apunta nun comunicado.
Ademais, suliña que a súa presenza serve para reforzar os lazos de unión co movemento soberanista en Catalunya e traslada, unha vez máis, a súa solidariedade “cos presos e presas políticas na súa loita por acadar a república catalá independente, no exercicio do dereito de autodeterminación dos pobos”.
A delegación do Bloque depositou unha ofrenda floral diante do monumento a Rafael Casanova e reclama unha solución política que respecte a liberdade e a democracia.
CxG
Pola súa banda, outra delegación de CxG, encabezada polo Secretario Xeral Piñeiro Docampo, e integrada por Orlando Villamayor, secretario de Organización, e Daniel Leiros, Secretario de Estudos e Programas, participou xunto con PNV e PdeCat nos actos da Diada. O seu obxectivo é “artellar un traballo que leve a reedición de Galeusca”.
“Compre entender que o camiño Catalán non é o galego, pero dende CxG defendemos a democracia e por iso estamos aquí, é moi importante que unha forza como CxG teña voz, a igual que os socios de PNV e PDeCat, niso traballaremos en Barcelona estes días", suliñou Piñeiro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.