O PSOE vigués ve a Feijóo con medo logo de pedir explicacións sobre contratos "co seu amigo o narcotraficante"
Tamén lle critican ao presidente da Xunta que non estivese presente na noite do accidente do Marisquiño.
Por E.P. | VIGO | 14/09/2018 | Actualizada ás 18:19
Así o manifestou o portavoz do goberno local, Carlos López Font, quen proclamou que Feijóo "entrou en pánico". "Foi pedirlle explicacións dos contratos co seu amigo o narcotraficante e porse máis nervioso que nunca. Insulta a torto e a dereito, insulta ao alcalde de Vigo", constatou, en alusión a unhas declaracións do presidente galego nas que dicía que Abel Caballero e o sentido do ridículo son conceptos "incompatibles".
Segundo López Font, o presidente da Xunta "teno sinxelo, o que ten é que dar explicacións dos contratos que asinou co seu amigo o narcotraficante". "Pode seguir insultando, pero o que queremos é que explique, e iso é o que o pon moi nervioso", constatou.
Así mesmo, o concelleiro socialista afirmou que foi "bochornoso" que Núñez Feijóo "non estivese en toda a noite" do 12 ao 13 de agosto en Vigo, cando se produciu o accidente no festival O Marisquiño. "E iso é algo que nunca lle perdoarán os vigueses", sentenciou.
Pola súa banda, o alcalde de Vigo, Abel Caballero, afirmou sentirse "gravemente insultado" por Feijóo, "que ten esta forma de dirimir os seus propios conflitos". "Nunca contestei os insultos e non os vou a contestar agora", rematou.
