Por E.P. | SANTIAGO DE COMPOSTELA | 01/10/2018 | Actualizada ás 14:49
O portavoz parlamentario do PPdeG, Pedro Puy, asegurou que os exconselleiros de Medio Ambiente e Política Social, Beatriz Mato e José Manuel Rey Varela, respectivamente, "enriquecerán" coa súa experiencia de goberno o labor do Grupo Parlamentario Popular, no que asumirán "responsabilidades". Unhas "responsabilidades" coas que o PPdeG quere "visibilizar" a estes políticos para recuperar as alcaldías da Coruña e de Ferrol tras ter que deixar as consellerías.
Beatriz Mato e José Manuel Rey Varela deixaron o pasado mércores as súas funcións no Executivo galego para dar o salto á política municipal, xa que a exconselleira de Medio Ambiente será a candidata do PPdeG á Alcaldía da Coruña e o extitular de Política Social á de Ferrol, Concello que xa gobernou entre 2011 e 2015. Con todo, a pesar da súa marcha de Goberno da Xunta, os dous continuarán coa súa acta de deputados no Parlamento autonómico.
Os cambios no Goberno galego anunciados polo presidente da Xunta, Alberto Núñez Feijóo, tamén motivaron unha "reorganización" do Grupo Parlamentario Popular xa que, como lembrou Pedro Puy, o novo conselleiro de Medio Rural era o portavoz do PPdeG na Cámara para os asuntos desta área.
Respecto diso, Pedro Puy recoñeceu que, aínda que "até agora" tanto Rey Varela como Beatriz Mato "fixeron menos vida parlamentaria" polos seus traballos no Goberno galego, a partir deste momento "asumirán responsabilidades" no grupo, encomendas que compaxinarán coa campaña do PP nas respectivas cidades.
DEBATE SOBRE O ESTADO DA AUTONOMÍA
O portavoz popular sinalou que esta "reorganización" do grupo foi un dos asuntos abordados na reunión que os deputados populares galegos mantiveron este luns, encontro no que os parlamentarios do PPdeG tamén abordaron a organización do próximo Debate sobre o Estado da Autonomía que terá lugar do 9 ao 11 de outubro.
Precisamente, Pedro Puy incidiu en que este debate permitirá contrastar a situación de Galicia coa "visión completamente errada" que dan dela os grupos da oposición. Todo iso en referencia ás declaracións pronunciadas este luns pola líder do BNG, Ana Pontón, quen considerou que Feijóo chega a esta cita "esgotado" após un "decenio negro" en emprego, igualdade e dereitos.
Ademais, o portavoz popular considerou que a cita parlamentaria da próxima semana posibilitará concretar iniciativas para a segunda parte da lexislatura, un mandato que, na súa opinión, caracterízase por "unha boa xestión" que fai que Galicia sexa "referente" para outras autonomías en materias como a educación pública.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.