Por E.P. | VIGO | 17/10/2018 | Actualizada ás 18:27
A CIG-Industria esixiu este mércores que se "aclare" a necesidade "real" de man de obra no naval de Vigo. Fíxoo durante unha concentración ante a sede da patronal Asime (Asociación de Industriais Metalúrxicos de Galicia) na cidade olívica.
A central sindical esgrimiu que os datos "difundidos nos medios" dunha situación de "puxanza" e de necesidade de man de obra "non coinciden" cos datos que eles manexan e pide que "non se xogue" coas "expectativas de emprego" de miles de parados.
César Rodríguez, responsable do naval en CIG-Industria de Vigo, solicitou unha reunión coa patronal para coñecer "de onde saen eses datos" porque, sostivo, "só hai dous estaleiros con carga de traballo asegurada" na cidade.
Rodríguez manifestou que a "recuperación real" do sector naval chegará cando existan "dous ou tres unidades en cada estaleiro" e carga de traballo "para dous ou tres anos". Mentres, considerou que non se pode considerar que o sector estea a pleno rendemento.
O representante sindical sinalou que só "Freire e Armón" contan con máis dunha unidade en construción, para despois indicar que o resto de estaleiros de Vigo só teñen unha e carecen de "carteira de pedidos para o futuro".
CIG-Industria asegura que "só nestes seis últimos meses" disminuíron "de 2.600 a 2.000" os operarios cos que contaba o sector, que alcanzou un pico de 10.000 no período 2007-2010.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.