A Xunta defende o seu traballo contra as velutinas: "Se non fose polo que fixemos, Galicia estaría invadida"

A conselleira de Medio Ambiente, Ángeles Vázquez, lembroulle á plataforma Stop Velutina todo o que a Xunta "puxo encima da mesa" para combater esta especie invasora, que "veu para quedar". "O traballo que veu desenvolvendo en relación e en cooperación coa Consellería de Medio Rural e a de Medio Ambiente deu o seu resultado. Se non, é que teriamos toda Galicia invadida de velutinas e ademais serían millóns de velutinas as que teriamos", afirmou en declaracións aos xornalistas antes de participar no Consello Galego de Medio Ambiente.

Cuestionada polas peticións da plataforma, a titular de Medio Ambiente fixo referencia tamén a que "é moi importante, sen dúbida, a investigación" neste ámbito. "Porque, se non, estamos a dar paus de cego", advertiu. Xunto a iso, subliñou que "a protección para os apicultores é fundamental" e sinalou que a Xunta "vai continuar coa repartición de trampeo, igual que se fixo ao longo destes anos".

Pero, ao seu xuízo, "o que hai que valorar é se se pode facer un trampeo masivo". "Entendiamos até agora e así nos avalaban que temos que facer trampeos en zonas determinadas para protexer as colmeas, pero non masivos porque poden supor un problema para a biodiversidade", avisou.

Así as cousas, valorou que Stop Velutina "está a facer un bo labor" pero engadiu que cre "que debería facer tamén unha análise de todo o que se puxo encima da mesa, como poden ser os líquidos, o trampeo, a retirada de niños...". "E, despois, situarnos claramente á hora de determinar se o trampeo ten que ser masivo ou non", resolveu.

PROXECTO EUROPEO

Á marxe disto, a conselleira fixo referencia ao proxecto de intercambio de experiencias sobre a velutina entre países europeos no que participará a Xunta.

"Imos traballar na procura de solucións, no ámbito da investigación pero tamén con outros países como pode ser o exemplo de Francia, que ten moitos estudos encima da mesa. Non podemos perder o tempo. Todo aquilo que estea investigado, o que faremos será absorbelo e a partir de aí tentar abrir novas liñas de investigación", expuxo.

Nesta liña, destacou que "os polinizadores son moi importantes" e indicou que o "problema" está "non tanto xa no que é a recollida de mel, que non baixou moito este ano en relación a outros anos", senón "para toda a sociedade en xeral, que investiu moito". "Sobre todo para retirar os niños. Temos que facer algo máis de cara a un futuro", apostilou.