Por Europa Press / Redacción | VIGO | 13/11/2018 | Actualizada ás 13:21
O comité de empresa do Hospital Povisa de Vigo concentrouse este martes ante o centro para advertir de que as negociacións co Sergas para evitar o concurso de acredores "non valen" se "non repercuten nos traballadores" e "non recollen" as súas reivindicacións. Por iso, anunciaron que iniciarán mobilizacións.
Nos próximos días concentraranse ante a sede do Partido Popular en Vigo e ante o edifico central do Sergas en Santiago. A presidenta do comité de Povisa, María Xesús Neira, asegurou que non aceptarán "seguir cos soldos conxelados até 2024", data na que finaliza o actual concerto coa Administración pública.
Povisa trasladou ao comité que chegaron a un acordo respecto da "medicación ambulatoria de alto impacto", que era un dos puntos que reclamaba o hospital privado ao Sergas debido ao incremento do seu custo e a que figuraba dentro do prezo per cápita.
Tamén chegaron a un acordo sobre o 'Plan especial de redución de listas de espera', 'Perle', polo que Povisa realizará unha serie de intervencións cirúrxicas para "acelerar" as listas de espera do Sergas e cobrarao "a parte" do concerto, segundo fontes consultadas por Europa Press.
A presidenta do comité manifestou que decidiron facer as mobilizacións porque lles dixeron que "non haberá subida salarial" e que "non se ía a negociar o convenio colectivo" e que todos os acordos aos que están a chegar co Sergas "son para manterse a pre sen perdas nin ganancias ata que finalice este concerto".
Neira concedeu que a negociación é un "parche" até 2024 cando termina o concerto actual entre o Sergas e Povisa. "Pero ese parche si vai dar beneficios ao hospital, non van negociar só para quedar a pre, van conseguir beneficios e eses beneficios non van repercutir nos traballadores", aseverou.
A presidenta do comité sostivo que a empresa lles informa "pouco" do estado das negociacións e que "descoñecen todos os acordos", aínda que lles trasladaron que están "en vías de chegar a acordos antes de que termine o ano" para evitar o concurso. Un centenar de persoas acudiron a concentrarse fronte ao hospital privado máis grande de España con berros de "non á precarización" e "Povisa culpable, é a responsable".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.