O PPdeG evita criticar un pacto coa ultradereita de VOX en Andalucía
Tellado defende que o "modelo educativo sexa homoxéneo" no conxunto do estado pero xestionado por cada comunidade.
Por Europa Press / Redacción | SANTIAGO DE COMPOSTELA | 30/11/2018 | Actualizada ás 14:23
O secretario xeral do PPdeG, Miguel Tellado, considerou que "non se pode censurar" ningún acordo que "non está exposto" e lembra que un posible pacto entre os populares e VOX en Andalucía após as eleccións autonómicas deste domingo "non está encima da mesa".
Despois de que o líder do PSdeG, Gonzalo Caballero, cuestionase aos populares galegos se senten "cómodos" nun partido aberto a chegar a acordos coa "ultradereita", Tellado lembroulle ao socialista que o PSOE "utilizou o apoio de Bildu e dos secesionistas cataláns para chegar á Moncloa".
"Non se pode censurar ningún acordo que non está exposto, que non está encima da mesa e menos por aqueles que pactaron con Bildu e os secesionistas cataláns para arrebatar o Goberno ao PP fai só cinco meses", apuntou.
Tellado pronunciouse deste xeito nunha rolda de prensa na que cargou contra o BNG por manter contactos con Bildu e ERC, como o que este venres celebran en Santiago de Compostela para ultimar acordos para unha candidatura conxunta para as eleccións europeas.
"Parece que finalmente asinarán ese acordo e que o futirible cabeza de lista vai ser Oriol Junqueras, quen está acusado de delitos graves como rebelión e sedición", censurou Tellado, que argumentou que, con este pacto, o BNG traslada que se chegase ao Goberno o seu modelo de sociedade sería o da "antiga Batasuna" e o do "independentismo catalán".
RECENTRALIZACIÓN DA EDUCCIÓN
Na rolda de prensa e preguntado sobre a proposta do líder do PP, Pablo Casado, de recentralizar competencias de educación, Miguel Tellado apostou por un "modelo educativo único" xestionado nas distintas comunidades autónomas.
Neste sentido, sinalou que a proposta do PP débese a que comunidades como Cataluña xestionaron as súas potestades educativas para "adoutrinar". Por iso, apuntou que, do que se trata, é de que o "modelo educativo sexa homoxéneo" e de que "non haxa 17 distintos".
"Unha cousa é que se homoxeneicen os contidos e outra é centralizar unhas competencias que hoxe en día están descentralizadas e que se exercen con absoluta normalidade e lealdade no conxunto do Estado", sinalou.
Ademais, rexeitou que o discurso do PP experimentase un xiro á dereita. "Non houbo ningún congreso no que se debatese a base ideolóxica", lembrou para sinalar que non se debe confundir a "vehemencia" na defensa das ideas con "que sexan radicais". "Somos un partido moderado, demostramos un profundo sentido de Estado na defensa dos intereses xerais", subliñou.
