O Concello da Coruña organiza un foro de debate sobre o presente e o futuro de Alcoa

O Concello da Coruña organiza un foro de debate sobre o presente e futuro de Alcoa, que se celebrará o 11 de decembro no Paraninfo da Universidade da Coruña (UDC) e que terá lugar despois de que a multinacional anunciase o peche da fábrica coruñesa.

Na organización deste foro colaboran, entre outras entidades, o Colexio Oficial de Graduados Sociais da Coruña e Ourense, "dada a súa especialización profesional en relacións laborais", explican desde a entidade colexial coruñesa sobre o contido deste encontro.

O foro, que se inaugurará ás 9,00 horas, incluirá tres mesas redondas centradas en distintos aspectos relacionados co conflito de Alcoa, vistos desde as perspectivas social, laboral, institucional ou sindical.

O alcalde da Coruña, Xulio Ferreiro, será o encargado de inaugurar o encontro, xunto coa presidenta do Colexio de Graduados Sociais, Susana Soneira, nun acto que contará tamén con representación da Universidade da Coruña (UDC).

Nas mesas redondas, participarán representantes do Colexio de Graduados, Parlamento de Galicia, Consello Galego de Relacións Laborais, Fundación Escola Universitaria de Relacións Laborais e seccións sindicais de CIG, CCOO e UXT en Alcoa.