“Non marchamos ata que non haxa un compromiso serio”
Os activistas de Rumbo a Gaza pecháronse este martes na embaixada de España en Grecia. Queren que o Goberno interveña para que poña fin ao seu “secuestro” polas autoridades helenas para seguir rumbo a Gaza.
Por Xurxo Salgado | Santiago | 05/07/2011 | Actualizada ás 18:21
Cinco galegos viaxan a bordo do Guernika, o barco no que tamén van outros 30 activistas españois e que forma parte da segunda Flotiña da Liberdade 'Rubo a Gaza'. Un deles é o responsable internacional da CIG, Moncho Boán que xunto con outros 21 integrantes do movemento solidario con Gaza, incluído o membro de Esculca Fernando Blanco, tomaron pacificamente a embaixada de España en Grecia.
“A nosa idea é seguir pechados na embaixada ata que non haxa unha resposta contundente e un compromiso serio por parte do Goberno español”, apunta Boán. O seu obxectivo non é outro que conseguir a intervención do Goberno de España para que interceda ante as autoridades gregas e deixe en liberdade aos 49 españois retidos (15 son membros da tripulación do barco).
Reunión co embaixador
Os 21 activistas tomaron a embaixada ás 13.00, hora local (unha hora antes aquí), mentres que outro grupo de cinco quedaba fora con pancartas alusivas ao secuestro do Guernika e do resto de 13 naves que compoñen a flota. A toma da delegación diplomática foi pacífica, “nós vimos a porta aberta e entramos. Ninguén nos impediu a entrada”. Desde entón, mantiveron un encontro co embaixador para ver se o Goberno español intervén.
Non hai ánimos de embarullar nada, nin de enfrontarse coas autoridades españolas, senón de que estas faciliten a súa saída da illa de Creta, onde todos os barcos da flota 'Rumbo a Gaza' están retidos desde o pasado 1 de xullo e vixiados pola Armada grega. “Non é lóxico que estando na UE, onde hai liberdade de tránsito, esteamos aquí sen que exista ningún cargo contra nós”, apunta.
“Perigo” para o Mediterráneo Oriental
Nos primeiros días retivéronos por cuestións “administrativas”, pero desde o pasado venres o Goberno grego aprobou unha orde ministerial que impide a súa saída ao consideralos “perigosos” para a seguridade do Mediterráneo Oriental.
“Trátannos coma terroristas”, apunta Boán que critica ao Goberno grego por “facerlle o traballo lixo a Israel”. O único que queren, di, é chegar a Gaza para entregar as 10.000 toneladas de axuda humanitaria que levan e criticar, ademais, o bloqueo da franxa por parte do Goberno israelí.
