Por Galicia Confidencial | Nigrán | 07/01/2019 | Actualizada ás 20:32
O 2018 pode considerarse "outro mal ano para os arroaces das Rías Baixas". Segundo os datos obtidos a través do seguemento que fai CEMMA (Coordinadora para o Estudo dos Mamíferos Mariños), complementado co traballo da rede de varamentos, naceron nove cachorros, pero catro deles morreron nos primeiros meses de vida. Ademais, outros catorce xuvenís e adultos morreron nesta zona, polo que foi outro ano con máis mortes que nacementos dentro da poboación.
No norte de Galicia morreron catro adultos máis, aínda que alí non se fixo un traballo específico para control de nacementos, polo que non se pode valorar a situación local, indica a CEMMA.
O caso máis significativo, expoñen, foi o dunha femia que estivo levando o corpo do seu cachorro morto durante tres días na ría de Vigo, acompañada doutros individuos. Este comportamento, a modo de dó, xa se ten observado noutras ocasións nesta e noutras especies de cetáceos, explica a CEMMA.
A captura accidental segue a ser a principal causa de morte e varamento con máis do 50% dos casos examinados e con causa de morte coñecida, seguida da mortalidade infantil cun 22% e enfermidades patolóxicas nun 10% dos casos, e incluso nalgún caso dos varamentos vivos atendidos foron comprobados indicios de captura accidental.
A CEMMA salienta que a poboación de arroaces en Galicia non está en risco polo momento, pero advirte de que a situación persistente de alta mortalidade observada nos últimos anos, superando o número de exemplares que nacen, pode converterse nunha serie ameaza, e se cabe é máis grave ao aumentar os casos de mortalidade infantil e de femias adultas, o que pode influir negativamente na situación poboacional da especie.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.