O delegado do Goberno sinala ao aumento da accidentalidade ao exceso de confianza dos condutores

Galicia pechou o ano 2018 con 104 vítimas mortais nas estradas da comunidade, o que supón un incremento respecto dos datos de 2017, cando foron 76 as persoas falecidas nas estradas galegas. O delegado do Goberno en Galicia, Javier Losada, atribuíu estes datos ao exceso de confianza e ao aumento das distraccións. Acompañado pola coordinadora da DXT en Galicia, Vitoria Gómez, e polo xefe do Sector de Tráfico da Garda Civil, Francisco Javier Molano, o delegado do Goberno presentou o balance de accidentalidade nas estradas galegas durante o ano 2018, cuxos datos cualifica de "preocupantes".

A estatística apunta a que en 2018 producíronse nas estradas de Galicia 12.308 accidentes dos que 99 rexistraron 104*falecidos. Por provincias, A Coruña acumulou 45 vítimas mortais fronte ás 33 de 2017. Pontevedra pasou de 20 a 24. Lugo sumou 20 tras un 2017 con 16 persoas falecidas. Ourense pasou de 7 a 15 vítimas. Losada significou que ata a primeira metade do ano as cifras de sinistralidade mantiñan unha liña descendente: "de feito o mes de abril foi o primeiro da serie histórica onde rexistramos 0 vítimas mortais na estrada".

Esta tendencia que melloraba os datos do 2017 rompeu no mes de xullo e o verán pechou co dobre de mortos na estrada que o ano anterior. Seguidamente, setembro foi un mes significativamente malo para as vías galegas, con 15 falecidos fronte aos 4 ocorridos en setembro de 2017.

EXCESO DE CONFIANZA AO VOLANTE

Entre as causas, Losada advertiu dun cambio nas condutas ao volante, nas que agora se observa un exceso de confianza e un aumento das distraccións. "Os responsables de seguridade viaria alértannos dunha maior relaxación ao volante", asegurou. Para o delegado do Goberno, un dos datos que apunta a esta sensación de falsa seguridade ao volante é o uso do cinto e outros sistemas de retención: "o 20% das vítimas mortais en accidentes na estrada do ano pasado non usaban o cinto de seguridade no momento do sinistro".

Xunto ao factor humano, súmase o estado das vías e dos vehículos. En canto ás vías onde se rexistraron accidentes mortais en 2018, o 88,5% en producíronse vías convencionais. Unhas estradas onde proximamente se aplicará a rebaixa de velocidade máxima permitida de 100 a 90 km/h que aprobou recentemente o Goberno. En canto aos vehículos, o delegado apuntou que "en dous terzos dos accidentes de tráfico en 2018 estiveron implicados vehículos de máis de 10 anos".

MÁS VIXILANCIA

Ante os datos do último ano, o delegado avanzou que intensificarán a vixilancia nas estradas. Así, anunciou que se realizarán en Galicia 840.000 controis de alcol; 15.000, de consumo de drogas e 3,3 millóns de controis de velocidade. En canto ás campañas especiais, a previsión para o ano 2019 é realizar ao redor das 40 campañas, tanto as de tipo nacional como específicas para Galicia.

O ano pasado realizáronse 36 campañas especiais de control ao longo do ano, onde se vixiaron aspectos como a velocidade, consumo de alcol e drogas e estado do vehículo, ademais dunha campaña específica de control de distraccións que era a primeira vez que se abordaba.