Persoal de Proxecto Home denuncia que a entidade "está a esquecer" os valores da organización

O que fora coordinador do centro de Proxecto Home de Lugo, Héctor López, denunciou as "represalias" cara aos traballadores por parte da xerencia da entidade, algo que entende como unha resposta ás "simples" demandas laborales. Falou, así mesmo, de "ruptura" co ideario da Fundación Monte do Gozo-Proxecto Home Galicia no que se refire ás persoas que están en cargos de responsabilidade. Segundo lamentou, a xerencia da entidade "está a esquecer" os valores da organización.

En concreto, fala da "falta de aposta da xerencia pola formación continua dos traballadores e por un clima de traballo satisfactorio", ao que engade que "antepoñen decisións de gastos en cuestións que non teñen importancia", esquecendo, resaltou, "que o eixo fundamental de Proxecto Home é a terapia".

Así, o ex coordinador do centro de Lugo criticou "a situación de total represión e ditadura por mor da simple demanda da aplicación do convenio estatal de acción e intervención social por parte dun grupo de traballadores". Foi a partir de devanditas reivindicacións en materia laboral cando se iniciou "unha escalada de represalias de moi diversas formas, empezando por algo moi sutil como pode ser deixar de falar e marcar a esas persoas como non válidas ata pechar os centros de Lugo e Pontevedra", comentou.

Héctor López reprochou á fundación "os traslados indiscriminados e sen sentido" dos traballadores a case 200 quilómetros das súas casas e as presións ás que se vían sometidos "para evitar contacto directo cos usuarios e as familias para que non tivesen coñecemento da situación".

"Queren facer ver que son os traballadores os que van romper unha institución cando o único que fan é exercer os dereitos e solicitar pequenas melloras das condicións e do salario. Poderíase chegar a un acordo se houbese negociacións, pero ninguén se quixo sentar connosco", expresou.

Ademais, o ex traballador de Proxecto Home advertiu de que "existe xa unha sentenza condenatoria por vulneración de dereitos fundamentais cara ao director xerente, Ramón Gómez Crespo. "Isto demostra que non está lexitimado para o cargo", apuntou, "estamos a falar dunha organización que necesita persoas cunha sensibilidade diferente"

O pasado 26 de setembro pechouse o centro de Lugo "esgrimindo razóns inxustificables", recordou, e trasladaron o coordinador ao programa de Vigo, a 191 quilómetros do seu domicilio.

"Aos usuarios que se estaban atendendo neste centro informóuselles de que podían terminar a súa terapia no centro de Santiago de Compostela, pero resultou imposible porque algúns traballan, outros son da costa lucense e case non teñen medios de transporte e outros non dispoñen de recursos. Todos causaron baixa estando na última fase do programa", explicou Héctor López.