En Marea ve "insuficiente" a OPE en Educación e di que disparará o número de interinos
Lamenta o "desprezo" da Consellería de Educación "cara á negociación colectiva rexeitando calquera sugestión por parte dos axentes sociais.
Por E.P. | SANTIAGO DE COMPOSTELA | 23/01/2019 | Actualizada ás 14:54
O Grupo Parlamentario de En Marea cualificou de "insuficiente" a Oferta Pública de Emprego (OPE) para 2019 en Educación porque "non recupera as prazas suprimidas coa escusa da crise". "Non podemos falar de recuperación ata que nos devolvan todo o que nos quitaron coa escusa da crise", afirmou a deputada de En Marea Luca Chao este xoves.
O pasado mércores, a Xunta anunciou a convocatoria dunha oferta pública de emprego (OPE) para 2019 que incluirá un total de 2.064 prazas, das cales 1.788 serán de acceso libre e 276 de promoción interna.
Para En Marea, a oferta confirma o "modelo de emprego público" do PP, xa que a cifra de profesorado interino situarase "aproximadamente nun 10 por cento" cando "antes da chegada" dos populares ao Goberno da Xunta a taxa era "do 5 por cento".
Ademais, lamenta o "desprezo" da Consellería de Educación "cara á negociación colectiva rexeitando calquera sugestión por parte dos axentes sociais e ignorando, unha vez máis, as demandas do persoal interino".
"Seguimos reclamando que se atendan as demandas deste colectivo coa finalidade de articular un plan de estabilización do profesorado galego que permita dar maior seguridade ás persoas que, durante anos, sosteñen co seu traballo a educación dos nosos fillos", afirma.
