A Xunta procura afianzar a cooperación con Cuba
Nunha visita institucional, o director xeral de Relacións Exteriores e coa UE, Jesús Gamallo, quixo informarse sobre as prioridades actuais do país e poñer en valor algúns proxectos nos que colaborara Galicia.
Por E.P. | SANTIAGO DE COMPOSTELA | 24/01/2019 | Actualizada ás 12:57
O director xeral de Relacións Exteriores e coa UE, Jesús Gamallo, finalizou este xoves unha visita institucional a Cuba na que, ademais de coñecer proxectos financiados pola cooperación galega nos últimos anos, mantivo distintas reunións do Goberno cubano.
No marco desta viaxe, Gamallo reuniuse con responsables do Ministerio de Educación e do Ministerio de Comercio Exterior e Investimento Estranxeiro (MINCEX), co obxectivo de informarse sobre as prioridades actuais para o país no ámbito da cooperación internacional, en especial no sector da educación.
Nas reunións anteriores quedara patente o interese do Goberno cubano en traballar xunto con Unicef no ámbito da saúde, ademais de continuar o traballo con adolescentes na Habana Vella en colaboración coa Oficina do Historiador da cidade.
A maiores, Jesús Gamallo e o representante do Ministerio de Comercio Exterior e Investimento Estranxeiro valoraron tamén a oportunidade de iniciar en Cuba unha intervención no ámbito da pesca artesanal.
Ademais, no ámbito da cooperación cultural, visitaron a sede da Compañía de Danza de Litz Afonso, unha recoñecida mestra de danza e pedagoga cubana que en 1991 fundou a súa propia compañía, na que participan uns 1.200 nenos e adolescentes cubanos. Desde 2011, Litz Afonso é embaixadora de Boa Vontade de Unicef.
MÁIS VISITAS
A delegación da Xunta tamén acudiu a un centro de atención de adolescentes na Habana Vella, xunto con representantes de Unicef e da directora de Cooperación e Relacións Internacionais da Oficina do Historiador da Habana, Nelys García. Neste espazo impártense talleres de creación e actividades culturais e proporciónanse servizos de documentación e asesoramento.
Con este centro xa colaborara anteriormente a Xunta de Galicia no marco do plan Proxecta da Consellería de Educación, Universidades e Formación Profesional.
