Traballadores de Vodafone buscan apoios políticos contra os 41 despedimentos en Galicia

Demandan unha reunión co conselleiro de Economía

Por Europa Press / Redacción | SANTIAGO DE COMPOSTELA | 05/02/2019 | Actualizada ás 16:53

Comparte esta noticia

Traballadores de Vodafone comezaron unha rolda de contactos a nivel político en busca de apoio para conseguir a retirada do ERE extintivo na compañía, polo que se prevé o despedimento de 41 persoas en Galicia (dun total 1.200 en España).

Reunión de traballadores de Vodafone con grupos parlamentarios. CIG
Reunión de traballadores de Vodafone con grupos parlamentarios. CIG | Fonte: Europa Press

A CIG informa de que os comités de empresa de Vodafone das provincias de Pontevedra e A Coruña iniciaron as reunións con grupos do Parlamento galego, así como cos gobernos locais de Vigo e A Coruña para conseguir apoio ás súas reivindicacións.

Ademais, solicitaron unha reunión co conselleiro de Economía, Francisco Conde, para poder transmitirlle "de primeira man" as consecuencias de que se perda o 25 por cento do persoal, que é cualificado e presta labores comerciais, así como de despregamento e mantemento de rede, entre outras.

O sindicato denuncia que unha multinacional "con beneficios opta pola destrución de emprego como alternativa a unha ineficaz xestión empresarial, e unha vez máis os traballadores verán destruídas as súas expectativas laborais co obxectivo de manter beneficios".

Xunto a isto, reflexionan sobre que esta medida afectará tamén a postos de empregos indirectos en Galicia, xa que son varias as empresas coas que traballan que "verán reducidos os seus contratos, co consecuente prexuízo para a economía galega".

Pola súa banda, continúan as mobilizacións. Este martes e o xoves hai convocados paros dunha hora a nivel estatal, con concentracións ante as oficinas que a empresa ten nas cidades da Coruña e Vigo. Ademais, haberá novas xornadas de folga de 24 horas os días 11, 13, 18 e 20 de febreiro.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta