Por Europa Press / Redacción | SANTIAGO DE COMPOSTELA | 01/03/2019 | Actualizada ás 18:13
Un total de nove candidaturas, todas promovidas pola dirección do partido instrumental que encabeza Luís Villares, concorren ás primarias de En Marea para a configuración das listas para as eleccións xerais do 28 de abril e os comicios ao Parlamento europeo, que se celebrarán o 26 de maio.
Así, a pesar das invitacións a participar no proceso efectuadas polo líder de En Marea, Luís Villares; o sector crítico --integrado por Anova, EU, Podemos e as mareas municipalistas de Santiago, A Coruña e Ferrol-- abstéñense de participar nas primarias, o que aboca a En Marea a dividirse en dúas candidaturas para o próximo 28 de abril. Deste xeito, oito candidaturas oficialistas concorren ás primarias para configurar as listas do catro provincias galegas para as Cortes e o Senado. Para o Parlamento europeo, a actual eurodeputada Lídia Senra figura como número uno da proposta da dirección de Luís Villares.
Segundo confirmaron fontes do partido instrumental, a actual viceportavoz da coordinadora, Ana Seijas, ocupa o número un da lista pola Coruña; mentres que en Pontevedra a opción da cúpula de En Marea é Iris Malvido. O politólogo Iván Olmos en Ourense e a portavoz de Lugonovo Cristina Pérez en Lugo, completan as cabezas de lista das candidaturas ás provincias galegas para o Congreso.
CALENDARIO
O vindeiro luns, unha vez concluído o proceso de subsanación de erros, o comité electoral de En Marea publicará a relación de candidatos a figurar nas listas do partido instrumental para os próximos procesos electorais. Ese mesmo día arrincará a campaña electoral das primarias nas que os inscritos de En Marea poderán elixir os seus candidatos ás xerais e europeas. Deste xeito, a orde das candidaturas poderá sufrir variacións, xa que En Marea emprega un sistema de puntuación para definir a orde dos integrantes das listas.
Así, as votacións estarán abertas entre as 23,59 horas do 7 de marzo e a mesma hora do día. Segundo o calendario proporcionado polo comité electoral, o resultado provisional das primarias proclamarase o 11 de marzo. Dous días máis tarde, En Marea anunciará a lista definitiva de candidatos ás Cortes, Senado e Parlamento europeo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.