Por E.P. | SANTIAGO DE COMPOSTELA | 11/03/2019 | Actualizada ás 11:27
O Concello de Valga celebra un pleno extraordinario urxente este luns ás 12,00 horas, tras o que realizará tamén unha concentración de repulsa contra a violencia machista, despois do asasinato dunha muller o domingo a mans do seu marido.
O home de 46 anos, matou cunha escopeta á súa muller, de 43, na súa vivenda de Valga e despois suicidouse tamén dun disparo, segundo informaron a Europa Press fontes da Garda Civil da provincia.
Está previsto que o pleno extraordinario do Consistorio sirva para decretar varios días de loito e mostrar a firme condena contra a violencia machista, así como o apoio á familia da asasinada.
Fontes do Concello confirmaron que non lle constaban antecedentes de denuncias por violencia de xénero neste matrimonio, que tiña dous fillos, ambos os maiores de idade. Tamén o Parlamento de Galicia, para este mediodía, ten convocada unha concentración dun minuto de silencio en repulsa contra a violencia machista e en memoria das vítimas de Sober e de Valga.
E é que o venres, unha veciña de Sober (Lugo) de 63 anos foi asasinada en Madrid pola súa parella, un home de 81 que despois tamén se suicidou. Por iso, este Concello lugués realiza este luns ás 12,00 horas unha concentración en repulsa da violencia machista.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.