Ence cae na Bolsa ante o seu incerto futuro

As accións de Ence caeron un 1,61% ao peche da xornada deste luns, ante as dúbidas suscitadas sobre a concesión dos terreos sobre os que se sitúa a planta de celulosa de Pontevedra e o impacto que pode ter no plan de negocio da compañía. En concreto, os títulos da compañía papeleira e enerxética situáronse ao peche en 5,180 euros, despois de caer ao longo da sesión ata os 5,060 euros.

Ence decidiu manter os investimentos de 50 millóns comprometidos para 2019 na súa planta de Pontevedra, conxelando o resto de investimentos previstos no seu plan de negocio para esta planta ata saber que ocorrerá finalmente coa concesión da mesma.

A firma que preside Juan Luís Arregui deuse un prazo de catro semanas para presentar unha análise do impacto desta nova situación no seu plan estratéxico 2019-2023 e definir alternativas ao mesmo.

Entre elas podería estar o traslado de parte da produción da planta de Pontevedra á de Navia, aínda que a firma estima que a ampliación de capacidade produtiva desta planta non sería suficiente para alcanzar o obxectivo inicialmente fixado no seu plan estratéxico actual.

As dúbidas sobre a concesión da planta de Pontevedra poden facer variar as principais magnitudes do plan estratéxico, co que Ence prevía case duplicar o seu resultado bruto de explotación (Ebitda), ata alcanzar 550 millóns de euros en 2023 a prezos constantes da celulosa, á vez que se marcou o obxectivo de levar a cabo investimentos produtivos de 1.100 millóns durante o próximos cinco anos.

En concreto, a compañía estimaba no plan que o negocio da celulosa elevase a súa Ebitda ata os 400 millóns de euros e o de enerxía ata 150 millóns en 2023.

Se o proceso non se resolve de forma exitosa para a compañía, Ence reclamará todos os investimentos realizados na planta desde que se estendeu a concesión, que alcanzan 132 millóns de euros.

A compañía considera que mesmo no caso de que a Xustiza non lle dese a razón, deberían ser capaces polo menos de obter unha prórroga para a planta ata o 2033, o que implicaría unha duración da concesión de 75 anos en total.

O procedemento legal, que continuaría inicialmente coa decisión en aproximadamente un mes da Audiencia Nacional sobre se continúa cos procedementos en curso dando a opción a Ence de defenderse nos mesmos, podería alongarse entre 4 e 6 anos no caso de que se tivesen que esgotar todas as instancias legais, incluíndo o Tribunal Supremo, o Constitucional e instancias europeas.