A emigración galega de medio mundo coñecerá Sober por unha postal
Uxía Trail Bates foi a gañadora dun concurso que organiza o Concello de Sober con motivo da Feira do Viño de Amandi. A súa ilustración converteuse nunha tarxeta postal prefranqueada que chegará a galegos de Europa e América.
Por X.M. Fernández | Sober | 12/04/2019 | Actualizada ás 11:00
O Concello de Sober, organizou este concurso de debuxo infantil para que os máis pequenos/as coñezan a cultura do viño e se identifiquen con ela pois forma parte moi importante da identidade do lugar. A través dun acordo con Correos converteu o debuxo gañador nunha postal prefranqueada que se enviará aos Centros Galegos de Europa e América.
Con esta iniciativa tanto a XXXIX Feira do Viño de Amandi, como a localidade de Sober e toda a Ribeira Sacra terán presenza en todos aqueles países nos que exista un Centro Galego, tanto en Europa como en América.
No concurso participaron os centros escolares do Saviñao, Pantón e Sober, con 100 orixinais. O debuxo gañador foi o de Uxía Trail Bates, do CEIP Plurilingüe Virxe do Carme de Sober. Os traballos de todos os participantes están expostos na Casa da Cultura de Sober.
O Concello de Sober agasallou coas postais a todos os nenos e nenas que participaron no certame de debuxo e fixo entrega dun lote á gañadora e ao centro gañador, o CEIP Plurilingüe Virxe do Carme de Sober. A gañadora recibe tamén un premio valorado en 150 euros e concédese un accésit de 50 euros ao mellor debuxo de cada colexio participante.
A Feira do Viño celebrarase en Sober os días 20 e 21 de abril.
