Detido un veciño de Verín por roubar 103 chapas de encofrar nunha nave en Oímbra
Por E.P. | SANTIAGO DE COMPOSTELA | 23/04/2019 | Actualizada ás 10:14
A Garda Civil de Verín (Ourense) detivo a un veciño desta localidade tras ser sorprendido cando cargaba 103 chapas de encofrar subtraídas nunha nave industrial no municipio de Oímbra.
Segundo informou o Instituto Armado, ás 18,00 horas deste luns 22 de abril foi detido R.S.X., de 43 anos e veciño de Verín, como presunto autor dun delito de furto.
En concreto, relataron as mesmas fontes, foi sorprendido 'in fraganti' cando cargaba nunha furgoneta 103 chapas de encofrar nunha nave industrial da localidade de San Ciprián, en Oímbra, valoradas en 500 euros.
As dilixencias instruídas en relación con estes feitos foron remitidas ao Xulgado de Instrución número 2 de Verín.
