Nova protesta da CIG este venres na fábrica de Alcoa en San Cibrao para defender os postos de traballo
Esta concentración coincidirá coa data comprometida polo Goberno central para aprobar o estatuto de consumidores electrointensivos, de forma que reclama que se recoñezan as especificidades desta industria e dotala dun marco competitivo.
Por Europa Press / Redacción | SANTIAGO DE COMPOSTELA | 24/04/2019 | Actualizada ás 19:30
A CIG realizará este venres, 26 de abril, unha protesta na fábrica en San Cibrao, en Cervo (Lugo), en defensa do emprego e por unha tarifa estable para as electrointensivas.
Con esta mobilización o sindicato dá continuidade ao calendario de protestas que comezou no mes de outubro. Á cita asistirán, entre outros, o secretario xeral da CIG, Paulo Carril, e o secretario nacional de CIG-Industria, Xoán Xosé Bouzas Aboi.
Esta concentración coincidirá coa data comprometida polo Goberno central para aprobar o estatuto de consumidores electrointensivos, de forma que reclama que se recoñezan as especificidades desta industria e dotala dun marco competitivo.
Á espera de coñecer o texto definitivo, o sindicato censura que o borrador de estatuto elaborado polo Goberno "non só resulta tardío e insuficiente para atallar a grave crise da industria electrointensiva", "senón que mesmo dificulta unha solución efectiva para o sector".
