Comeza a xornada electoral en Galicia sen incidencias

As mesas electorais quedaron abertas ás 9,00 horas na "práctica totalidade" dos colexios de Galicia, salvo unha na cidade da Coruña por falta de persoas convocadas para atendela. Con todo, esta mesa abriuse con posterioridade ao presentarse un presidente e o seu suplente e tras ser chamada "unha persoa de reposto"

Así o asegurou, en declaracións a Europa Press, o delegado do Goberno en Galicia, Javier Losada, quen destacou que ás 9,00 horas estaban abertas o "99,97%" das mesas. Neste sentido, apuntou que na provincia de Lugo abríronse con normalidade o "100%" das mesas, así como nas de Ourense e Pontevedra. O mesmo delegado apuntou que sobre as 14:00 se coñecerán os primeiros datos sobre praticipación.

Mentres, na provincia da Coruña, na cidade herculina no colexio electoral establecido na Grande Obra de Atocha, no barrio coruñés de Monte Alto, "non apareceron as persoas propostas para sern presidentes e vocais", explicou o delegado do Goberno. Con todo, logo abriuse ao presentarse un presidente e tras ser chamada "unha persoa de reposto".

Javier Losada espera que este 28 de abril "sexa unha xornada tranquila" e "unha festa democrática" na que os galegos "acudan a facer algo que é fundamental para a democracia: que é emitir o voto".

DATOS

Un total de 2.240.616 galegos están chamados ás urnas este domingo para decidir os 23 deputados e 16 senadores que representarán ao catro provincias galegas nas Cortes Xerais. Deles, 66.291 pediron facelo por correo e outras 1.148 persoas que se atopan temporalmente no estranxeiro tamén realizaron os trámites. A xoves 25 de abril, estaban en custodia de Correos 50.942 papeletas de galegos.

A este total de electores, hai que sumar os 457.909 do censo de residentes ausentes (CERA) que tamén foron chamados a votar, dos cales solicitaron facelo un total de 22.228, segundo os datos de Instituto Nacional de Estatística (INE).

Dos 2,2 millóns de electores, 929.181 correspóndense coa provincia da Coruña; 772.631, coa de Pontevedra; 278.291, con Lugo; e 260.513, coa de Ourense. Do total de electores, 58.093 son novos que votan por primeira vez ao cumprir 18 anos desde os últimos comicios. Deles, 24.010 correspóndense á provincia da Coruña; 22.362, á de Pontevedra; 6.061, á de Lugo; e 5.660, á de Ourense.

Para os comicios deste domingo, foron solicitados 33 kits de accesibilidade para persoas cegas ou con discapacidade visual grave, das cales 16 foron na provincia da Coruña, nove na de Pontevedra e catro respectivamente en Ourense e Lugo.

PAPELETAS E CANDIDATURAS

En total, imprimíronse case 27,4 millóns de papeletas para o Congreso -- 10.545.000, na Coruña; 9.936.150, en Pontevedra; 3.900.000 en Ourense; e 3 millóns en Lugo--. Ademais, máis de 2,4 millóns de papeletas están impresas para o Senado -- 1.045.000, na Coruña; 828.150, en Pontevedra; 300.000, en Ourense; e 250.000 en Lugo.

Os galegos poderán elixir entre 49 candidaturas ao Congreso e 47 ao Senado. Todas as provincias, salvo Ourense con 13, contarán con 12 listas distintas para escoller aos oito deputados da Coruña, os 7 de Pontevedra e aos catro de Lugo. Os ourensáns tamén contan con catro representantes no Congreso.

Para o Senado, elíxense catro representantes en cada circunscrición. Haberá un total de 47 listas por provincia, 12 en cada unha delas salvo na Coruña, en que foron proclamadas 11.

MESAS ELECTORAIS

Galicia, segundo datos facilitados pola Delegación do Goberno, Galicia abrirá un total de 7.912 urnas en 3.956 mesas distribuídas en 2.416 locais electorais. Así mesmo, os galegos terán á súa disposición un total de 3.956 cabinas para salvagardar o voto secreto.

As mesas electorais estarán atendidas por 11.868 membros que foron xa seleccionados e 2.622 representantes da Administración, que se encargarán de verificar a correcta apertura das mesas, resolver incidencias e recoller os datos do reconto de voto.

TOTAL NORMALIDADE

O delegado do Goberno en Galicia, Javier Losada, destacou a "total normalidade" coa que está a transcorrer a xornada electoral, á vez que instou a unha participación "masiva" nestes comicios. En rolda de prensa, explicou que "o 100%" das mesas electorais, un total de 3.956, abríronse con total normalidade antes do dez da mañá. A provincia de Lugo foi a primeira na que se produciu a súa apertura, ás 9,06 horas; seguida da Pontevera, ás 9,15 horas; a de Ourense, ás 9,18 horas e, por último, a da Coruña, ás 9,51 horas.

Neste caso, atrasouse a apertura por unha incidencia no Colexio Grande Obra de Atocha onde, segundo explicou Losada, faltaba o vogal segundo, cuestión que finalmente emendou a Xunta Electoral mandando unha persoa.

A falta de actas de escrutinio en dous centros educativos da Coruña, o Luís Seoane e o Calvo Sotelo, ou a falta dun presidente e dun vogal segundo no Birloque foron outras das incidencias na cidade herculina. A elas, sumouse os problemas para acceder ao colexio electoral no colexio Sacra Familia. Finalmente, acudiu a Policía Local e abriu ao redor das 09,23 horas.

En Lugo, houbo un atraso no colexio Luís Pimentel, mentres que en Ourense as incidencias estiveron vinculadas cos presidentes, vocais e suplentes en tres colexios electorais, entre eles o da Facultade de Dereito. Losada explicou que, nun caso, o presidente escusara a súa ausencia, pero, finalmente, apareceu e tivo que resolver a Xunta Electoral a este respecto. Mentres, o Concello de Punxín (Ourense) reclamou un transporte institucional, unha incidencia que foi solucionada. En Pontevedra, as incidencias limitáronse á falta de vogais titulares.

CONDENA AOS ATAQUES A SEDES DO PSOE E CIUDADANOS

O delegado do Goberno en Galicia, Javier Losada, condenou os "ataques intolerables" ás sedes do PSOE en Pontevedra e de Cidadáns en Santiago rexistrados nas últimas horas e instou a que feitos así non "enturbien" a xornada electoral. "Deixemos que a Policía faga a súa investigación", instou. No entanto, avanzou que "nalgún caso quedaron restos dun martelo", sinalou en referencia en concreto á sede do PSOE en Pontevedra.