Por E.P. | Santiago de Compostela | 14/05/2019 | Actualizada ás 15:03
Compostela Aberta apostará no próximo mandato municipal por un "modelo urbanístico que poña ás persoas no centro" e que permita "humanizar os barrios de Santiago", impedindo que as infraestruturas viarias "supoñan fronteiras insalvables" para os veciños.
Así o dixo, en rolda de prensa, o alcalde e candidato á reelección, Martiño Noriega, que explicou que zonas como Vite, o Ensanche, Fontiñas, Sar, Romaño ou Conxo, así como o espazo rural, serán prioritarios na acción de goberno tras o 26 de maio.
Durante a súa intervención, Noriega pediu aos partidos políticos composteláns, especialmente en referencia a PP e PSOE, que sexan "responsables" en canto ás súas "mensaxes electorais" e que "traten aos veciños como maiores de idade". "O que nós non imos facer é propor investimentos millonarios que sabemos que son inasumibles", explicou.
Neste sentido, criticou que o candidato socialista, Xosé Sánchez Bugallo, "comprometa xa 300 millóns de euros para o primeiro ano de mandato", algo que "non é realizable" e que "xera falsas expectativas" aos veciños.
NECESIDADES "REAIS" DOS VECIÑOS
Durante este mandato, explicou Noriega, o goberno local "analizou as necesidades reais dos veciños" e repensou e desbloqueou " proxectos pendentes, algúns deles comprometidos desde fai máis dunha década".
Entre elas, mencionou actuacións como a reurbanización da Avenida de Vilagarcía ou Montero Ríos, a instalación do ascensor de Triacastela e o inicio da reforma de Castrón Douro, para onde agora propoñen a segunda fase.
Nesta situación, o candidato á reelección pediu aos veciños "catro anos máis para terminar este ciclo" e proxectar "a cidade de futuro", baixo a premisa de que "Compostela se faga a medida das persoas e non dos vehículos nin dos intereses das promotoras".
O concelleiro de Medio Rural, Rafael Pena, explicou que, incluíndo transferencias doutras administracións, o que se pode orzamentar para investimento "non pode pasar de 60 millóns ao ano", polo que criticou as promesas de candidatos "megalómanos" que "son directamente mentira".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.