A Lei de Rehabilitación da Xunta só contempla a expropiación como "última" opción

O presidente do Goberno galego, Alberto Núñez Feijóo, afirmou que a recentemente estreada Lei de Rehabilitación de Galicia só contempla a expropiación de inmobles como "última" opción, no caso de que o propietario dun edificio rexeite acometer as obras de acondicionamento.

Así o indicou, a preguntas dos medios, durante a rolda de prensa celebrada este xoves tras a reunión do seu executivo. Alí, Núñez Feijóo remarcou que o obxectivo da nova lei --en vigor desde o pasado mércores-- "non é expropiar, senón pór en valor as propiedades", especialmente nos centros históricos das localidades galegas.

"Estou convencido de que dentro de 10 anos con esta lei imos ver mellorados substancialmente todos os centros históricos galegos", indicou o mandatario popular, que sostén que o seu goberno "ten claro que o futuro da construción pasa pola rehabilitación".

Rehabilitación da rúa Ferrería en Vigo | Fonte: COAG.