Por Galicia Confidencial | Santiago de Compostela | 29/05/2019 | Actualizada ás 11:35
O BNG de Carnota inicia a nova lexislatura con duras críticas ao PSOE local. A través dun comunicado apunta aos socialistas como os responsables dun ataque á vivenda do seu candidato Milucho na noite electoral. Así, acusa a uns descoñecidos de rociar a súa casa “con algún produto químico que desprendía un intensísimo cheiro desagradábel”. Isto fixo “practicamente imposíbel permanecer no seu interior polo cheiro insoportábel que se prolongaría durante varias horas”.
O feito foi denunciado polo candidato nacionalista ante a Policía Local que se achegou á zona, redactou un informe e chamou á súa vez á Garda Civil, que xa está a investigar o incidente asi coma se os seus autores lograran acceder dalgún xeito ao interior da propiedade.
O BNG destaca que os problemas comezaran xa no Colexio Electoral de Lira, ao remate do reconto. “Un grupo de exaltados afíns ao PSOE comezaron a rebentar petardos potentísimos nas inmediacións do propio Colexio Electoral, detonando varios deles practicamente na porta do Colexio, desde onde o candidato socialista e os seus acólitos seguiran o reconto, berrando e burlándose mentras a Mesa trataba de rematar de cubrir as actas electorais”, apunta.
“Finalmente, tras o peche do Colexio estas persoas abandonaron a zona, mais o peor aínda estaría por chegar en Lariño”, apunta relacionando este caso co do ataque á casa do seu candidato. Por iso, no comunicado o BNG de Carnota “condea rotundamente o hostigamento” sufrido por Milucho.
“Este capítulo empana definitivamente o proceso electoral e pon o colofón a unha campaña orquestrada de acoso e derribo contra o noso candidato desde hai varios meses, co único obxectivo de minar a súa reputación política e persoal con mentiras e falsidades, destruílo moralmente e provocar o seu fracaso electoral, e todo co máximo ensanamento e ningún respecto polos máis elementais límites da cortesía política que se pode agardar nunha democracia madura”, suliña.
Estes feitos teñen lugar nun concello que, ata agora gobernaba o BNG por maioría absoluta. Con todo, tras as eleccións do domingo a forza máis votada foi o PSOE, que pasa de dous a cinco concelleiros, mentres que o BNG baixa de seis a tres e o PP mantén os tres que xa tiña. As críticas nacionalistas auguran un difícil pacto co PSOE, un pacto que a formación nacionalista podería manter nas deputacións onde xa gobernaba cos socialistas, así como nas grandes cidades galegas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.