Piden a "implicación" de todas as administracións para "evitar contaminación no río Barbaña"
A Subdelegación do Goberno en Ourense explicou que no primeiro trimestre deste ano leváronse a cabo todos os traballos correspondentes á inspección tanto da rede de saneamento como da EDAR existentes.
Por E.P. | SANTIAGO DE COMPOSTELA | 08/07/2019 | Actualizada ás 20:19
O subdelegado do Goberno en Ourense, Emilio González Afonso, sinalou este luns que a "colaboración e implicación de todas as administracións", así como a concienciación social e do tecido empresarial "son clave para evitar os episodios recorrentes de contaminación" no río Barbaña.
Así o indicou González Afonso tras unha reunión coa Comisión de seguimento do Barbaña, na que estiveron presentes tamén o presidente da Confederación Hidrográfica do Miño-Sil (CHMS), José Antonio Quiroga, ademais de representantes do Concello de Ourense, da Deputación Provincial e da Xunta, os alcaldes de San Cibrao das Viñas e Pereiro de Aguilar, e os presidentes dos polígonos industriais de San Cibrao, Pereiro e Barreiros, así como tres membros do colectivo ecoloxista Ríos Limpos.
O subdelegado do Goberno presidiu esta Comisión Permanente, que foi creada para establecer unha canle común e coordinar ás diferentes administracións co interese de "avaliar e levar a cabo solucións concretas que poñan fin ao problema recorrente de contaminación ao río Barbaña", segundo explicou a Subdelegación do Goberno en Ourense a través dun comunicado.
Pola súa banda, o presidente da CHMS e varios membros do organismo informaron sobre o proxecto de saneamento do río Barbaña e a mellora da Estación Depuradora de Augas Residuais de San Cibrao das Viñas, actualmente en redacción, e que deberá de estar finalizado en setembro.
"Este proxecto constitúe a toma dos datos necesarios e a formulación dun estudo integral de solucións alternativas que permitan determinar con exactitude as actuacións necesarias a realizar", explicaron as mesmas fontes.
SITUACIÓN DO PROXECTO
Desta maneira, a Subdelegación do Goberno en Ourense explicou que no primeiro trimestre deste ano leváronse a cabo todos os traballos correspondentes á toma de datos en campo, inspección tanto da rede de saneamento como da EDAR existentes, toma de mostras á entrada e saída da EDAR e a súa caracterización, así como outras actuacións.
"Con toda a información obtida procedeuse ao modelizado da rede e da EDAR existentes, para concluír as solucións técnicas máis adecuadas, tanto para o saneamento e depuración de augas residuais industriais, como para a drenaxe e tratamento de augas pluviais en toda a superficie afectada polo proxecto, que ascende a máis de 340 hectáreas", indicou.
Actualmente, está a redactarse o proxecto de construción do deseñado, que supón a substitución ou nova construción de 3,3 quilómetros de colectores de augas fecais, 16,5 quilómetros de colectores de augas pluviais, acondicionamento de 19 puntos de vertedura de augas pluviais e a adaptación da EDAR existente para conseguir tratar as augas residuais industriais sen xerar ningunha vertedura non depurada ao medio acuático.
"O citado proxecto dará como resultado unhas actuacións de saneamento integral do río Barbaña nas que o investimento estimado alcanzará os 24 millóns de euros, financiado a través de Fondos Feder do período 2014-2020; aproximadamente 14 millóns corresponden á remodelación da EDAR; 3 millóns, aos colectores de augas fecais, e 7 millóns aos colectores de augas pluviais e o seu tratamento" matizou Quiroga.
