Xunta e Consorcio dos Peares abordan as actuacións do plan de protección, infraestruturas e dotacións

A directora xeral de Ordeación do Territorio, Encarnación Rivas, presidiu este martes unha reunión entre a Xunta e os catro concellos que integran o Consorcio dos Peares para abordar as actuacións e traballos que levarán a cabo ao amparo do Plan Especial de Protección, Infraestruturas e Dotacións do Consorcio Local.

Neste marco, lembrou que se trata dun "instrumento de vangarda" que, por primeira vez, abarca dúas provincias distintas e catro municipios de "excepcionais valores ambientais e paisaxísticos", Pantón e Carballedo, pola provincia de Lugo, e A Peroxa e Nogueira de Ramuín, pola de Ourense.

A maiores, lembrou que a Consellería de Medio Ambiente, en colaboración co Consorcio Local dos Peares, redactou este plan especial, co que se busca preservar e protexer estes valores, cunha actuación "respectuosa co medio ambiente, onde priman as actuacións de rehabilitación do patrimonio construído, promovendo a súa mellora, conservación e rehabilitación das edificacións existentes".

Encarnación Rivas explicou que se trata de definir unha guía común para os catro concellos, co fin de mellorar as condicións estéticas, de uso e habitabilidade, establecendo as pautas de crecemento sustentable máis adecuadas e contribuíndo deste xeito a facer máis atractivo e interesante para os investidores privados todo o ámbito territorial ao que se refire.

O Plan especial, que abarca unha superficie de 350 hectáreas, concéntrase en manter as condicións ambientais dos núcleos, pero tamén prevé varios proxectos de urbanización para mellorar as condicións dos espazos públicos, así como os viarios internos que articulen e fixar dotacións e equipamentos. Eses proxectos terán efectos positivos na mobilidade, no espazo público e nos servizos existentes, mellorando a calidade dos mesmos.

Alfredo García e Encarnación Rivas en rolda de prensa