Abre o prazo para presentar candidaturas para a dirección do Centro Dramático Galego
A Consellería de Cultura busca así a substitución da actual responsable, Fefa Noia, dun posto que tamén inclúe a coordinación do Departamento de Produción Teatral na Axencia Galega de Industrias Culturais (Agadic).
Por E.P. | SANTIAGO DE COMPOSTELA | 30/08/2019 | Actualizada ás 18:31
A Xunta de Galicia puxo en marcha o procedemento público para presentar candidaturas para encargarse da dirección artística do Centro Dramático Galego (CDG) en substitución da actual responsable, Fefa Noia.
Este posto tamén inclúe a coordinación do Departamento de Produción Teatral na Axencia Galega de Industrias Culturais (Agadic), así como a xestión do Salón Teatro de Santiago de Compostela.
As bases de convocatoria publicáronse este venres no Diario Oficial de Galicia (DOG), desta forma a Consellería de Cultura e Turismo busca "axilizar o proceso de cobertura da vacante que deixará a actual directora do CDG, Fefa Noia", indicou a Xunta de Galicia nun comunicado de prensa.
O Executivo concretou que as tarefas encomendadas a este posto directivo radican en exercer a dirección artística do CDG; dirixir, coordinar e planificar o persoal e a actividade do Salón Teatro, entre outras.
Deste xeito, os candidatos que cumpran os requisitos para acceder ao posto de traballo poderán presentar a súa solicitude ata o próximo 27 de setembro.
