Por E.P. | MADRID | 30/09/2019 | Actualizada ás 18:30
O ministro de Agricultura, Pesca e Alimentación en funcións, Luís Planas, manifestou que as negociacións que se están mantendo no seo da Unión Europea para o deseño dunha nova Política Agraria Común (PAC), xa incluíron "unha boa parte" das peticións españolas.
Así o avanzou o ministro nun encontro cos representantes das organizacións profesionais agrarias no marco do Comité Asesor Agraria, reunido este luns en Madrid para analizar a reforma da PAC e os traballos de elaboración do Plan Estratéxico Nacional.
Así mesmo, Planas volveu a realizar unha "firme defensa" da necesidade de manter para a PAC 2021-2027 o mesmo orzamento que na actual programación, aínda que comentou que aínda non hai un calendario claro para chegar a un acordo sobre o financiamento.
De feito, o ministro advertiu de que a situación actual das negociacións "non é fácil" e que non será plausible alcanzar un acordo definitivo "antes de fin de ano". Doutra banda, Planas sinalou que continúan os traballos de elaboración do Plan Estratéxico Nacional, que se iniciaron en xaneiro, aínda que apuntou que esperan ter o primeiro borrador completo a mediados de 2020.
Neste sentido, destacou que o obxectivo do Goberno é presentar á Comisión Europea (CE) este plan axiña que os regulamentos o permitan, en 2021, para que a nova PAC poida entrar en vigor en España a partir de 2022. Por último, apuntou que a presidencia e a CE xa anunciaron a presentación dun regulamento de transición para que quede asegurada a continuidade da PAC para as solicitudes de axuda dos anos 2020 e 2021.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.