Os afiliados á Seguridade Social baixan en 7.353 persoas en setembro en Galicia

A Seguridade Social pechou setembro cun descenso medio de 7.353 afiliados (-0,71%) en Galicia con respecto ao mes anterior, ata situar o total en 1.029.548 cotizantes, segundo os datos que publica este mércores o Ministerio de Traballo.

En relación co mesmo período de 2018, son 15.660 afiliacións máis en Galicia, o que se traduce nun incremento do 1,54%.

O descenso intermensual é máis acusado que no escenario estatal (onde as afiliacións subiron respecto ao mes anterior un lixeiro 0,02%) e o incremento en relación a setembro do ano 2018 é máis baixo que o dato do conxunto de España (que rexistrou unha alza do 2,44%).

Por provincias, na comunidade galega contabilizáronse 438.517 cotizantes na Coruña; 124.543 en Lugo; 104.568 en Ourense; e 361.919 en Pontevedra.

Por réximes, son 797.615 afiliados no xeneral, 210.489 autónomos e 21.444 cotizantes no sector do mar.

DATOS ESTATAIS

No conxunto estatal, a Seguridade Social pechou setembro cun aumento medio de 3.224 afiliados (+0,02%), o seu peor dato neste mes desde 2013, cando perdeu 22.242 ocupados. Co repunte rexistrado no noveno mes do ano, o total de ocupados situouse en 19.323.451 afiliados, o seu mellor dato nun mes de setembro desde que existen rexistros.

En valores interanuais, a afiliación creceu en 460.739 cotizantes desde setembro de 2018 (+2,4%).

Na serie histórica de setembro, o repunte deste ano é inferior aos experimentados no período 2014-2018. En setembro do ano pasado gañáronse, por exemplo, 22.899 afiliados e en 2017, máis de 26.000. Hai que remontarse ao exercicio 2013 para atopar un setembro peor que o deste ano.

Como é habitual en setembro, co inicio do curso escolar, a educación foi o sector que máis empuxaron a afiliación, ao sumar 45.521 ocupados (+6%), seguido das actividades administrativas, que gañaron 21.681 afiliados (+1,6%), e da industria manufacturera, con 11.888 novos ocupados (+0,6%).

Por contra, tras o fin da tempada turística, a hostalaría encabezou os descensos da ocupación en setembro ao perder 44.346 afiliados (-3%). Seguiulle o comercio, con 34.330 cotizantes menos (-1,4%).

No sistema especial agrario gañáronse 26.285 afiliados en setembro (+3,7%), mentres que no sistema especial do fogar déronse de baixa 2.349 cotizantes (-0,6%).

O Réxime de Autónomos foi o principal impulsor do repunte da afiliación en setembro, ao gañar 4.707 cotizantes (+0,1%), fronte aos 139 novos ocupados que sumou o Réxime Xeral. Deste xeito, ao finalizar setembro, o Réxime Xeral contaba con 15.987.768 cotizantes e o de Autónomos, con 3.266.258. O Réxime do Mar, pola súa banda, perdeu 1.621 afiliados en setembro (-2,3%), mentres que o do Carbón rexistrou un ocupado menos.

Segundo os datos do Ministerio, as Administracións Públicas gañaron 90.426 cotizantes de media o pasado mes de agosto (último dato dispoñible) en relación ao mesmo mes de 2018 (+3,6%), especialmente a Administración Autonómica (69.121 novos afiliados, +4,8%), seguida da Estatal (+16.429, +4,9%) e da Local (+4.876, +0,68%).

Evolución da afiliación da Seguridade Social en Galicia. EPDATA | Fonte: Europa Press