Por E.P. | SANTIAGO DE COMPOSTELA | 28/10/2019 | Actualizada ás 11:02
Libera pediu que a asistencia médica do cazador ferido o domingo nunha perna no municipio ourensán do Barco sexa custeada polo seu seguro privado e non polo "conxunto da cidadanía".
Nun comunicado, a entidade animalista lembra que os cazadores deben subscribir seguros de responsabilidade civil que cubran todas as súas continxencias, á vez que tacha de "lamentable" o uso de recursos públicos para unha actividade "rexeitada socialmente".
A este respecto, apunta que esta situación "mobilizou máis recursos públicos que o triste desenlace de Donzón (Pontevedra)", en referencia ao home falecido despois de que unha ambulancia tardase tres cuartos de hora en aparecer.
Así mesmo, critica que o Sergas "non quere facer públicos os datos de intervencións relacionadas con actividades cinexéticas" co fin de "evitar que se coñeza o montante real de medios públicos que se dedica a unha actividade minoritaria e que só crea risco". Cifra en 14 os falecidos por caza en Galicia desde 2008.
Xunto a isto, Libera empraza a afastar os menores das cazarías, mentres lembra que miles de firmas piden que non participen para "evitar desenlaces fatais".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.