A Eurocámara debate sobre o 'Franquismo post Franco' e o BNG pide a devolución de Meirás
Ana Miranda, a portavoz do BNG en Europa, denunciou que o franquismo segue "demasiado presente nas institucións, na xustiza e na economía".
- Familiares de Alexandre Bóveda e Amancio Caamaño súmanse á querela arxentina contra o franquismo
- O BNG reclama que o Estado devolva 33 pezas que "foron expoliadas a Galicia" durante o século XIX e o Franquismo
Por Europa Press / Redacción | SANTIAGO DE COMPOSTELA | 20/11/2019 | Actualizada ás 18:01
A Eurocámara acolleu unha conferencia baixo o título 'Franquismo post Franco' co obxectivo de dar a coñecer en Bruxelas "a realidade da represión franquista, o espolio da ditadura vixente na actualidade e os pasos que se están dando para terminar coa impunidade", segundo destaca o BNG.
A través dunha nota de prensa, o Bloque informa de que ao longo da xornada os integrantes do grupo mostraron o seu "compromiso coa loita para terminar co espolio franquista".
No contexto desta charla, que organizou o grupo de memoria histórica do Parlamento Europeo, o seu portavoz en Europa, Ana Miranda, reclamou "a devolución" do Pazo de Meirás."Desde o Parlamento europeo demandamos a devolución do Pazo de Meirás e o resto de bens incautados", subliñou Miranda, segundo apunta o comunicado.
Ademais, Miranda denunciou que o franquismo segue "demasiado presente nas institucións, na xustiza, na economía, nos nomes das rúas, distincións e privilexios, nas fosas e no incumprimento da normativa internacional de dereitos humanos". Da conferencia deste martes destacou que deu "unha ampla visión de como o franquismo continúa na sociedade despois da morte do ditador".
