Denuncian outro "colapso" nas urxencias do CHUS con pacientes ciscados nos corredores, entre os que había un "terminal"

A Asociación de Pacientes e Usuarios do CHUS (Complexo Hospitalario Universitario de Santiago) vén de facer unha nova denuncia do colapso que se vive no servizo de urxencias deste centro.

O aviso chega logo de que un usuario enviase unha foto da situación que se vivía ás 14:20 horas deste xoves pasado, cando "oito pacientes estaban agardando nos corredores de acceso a ser atendidos en cadeiras de rodas e padiolas". Un deles, segundo os denunciantes, "era un paciente terminal que permaneceu mais dunha hora no corredor ata pasar a sala de observación".

"Ás 16:58 horas a situación foi a peor e eran 10 os pacientes amontoados no corredor", indican.

Mentres tanto, "como consecuencia da demora nos ingresos hospitalarios, 11 pacientes estaban ocupando as zonas de traballo en espera de ser trasladados a planta", engaden.

Desde a asociación critican que "a xerencia segue mantendo pechadas as 40 camas de medicina interna do Gil Casares e o anexo a ese edificio" e falan de "maltrato asistencial" porque "non se poñen os medios necesarios para que as camas hospitalarias estean dispoñibles no momento en que os facultativos do servizo as demandan".