Por Europa Press / Redacción | VIGO | 03/02/2020 | Actualizada ás 18:00
O vicepresidente da Xunta, Alfonso Rueda, pediu este luns ao líder do PSdeG, Gonzalo Caballero, que "se poña de parte de Galicia" na reclamación do pago do IVE pendente de 2017, tras constatar que "os seus" o deixaron "só".
Así o trasladou Rueda, a contestar sobre a posición das deputacións de Lugo e A Coruña, ambas as institucións presididas por socialistas, apoiando a reclamación ao Goberno de España dese pago.
"Aquí están as consecuencias de cando se defenden posturas insustentables", afirmou o vicepresidente galego, quen acusou a Gonzalo Caballero de soster "aquilo que non ten un pase" con tal de "non quedar mal co señor Sánchez".
Segundo sinalou, Caballero "está a empezar a quedar só" e quen o deixan só "son os seus, os membros do PSOE que empezan a ser un pouco valentes, que xa era hora tamén". "Empezan a recoñecer que a Galicia se lle está quitando aquilo que é seu", engadiu.
Alfonso Rueda lembrou que o PP non pode "admitir" iso e que tampouco o fan "algunha parte das forzas políticas", pero criticou a "papeleta" do secretario xeral do PSdeG, que "queda moito máis en evidencia cando os propios líderes do PSOE están a empezar a quitarlle a razón".
"A mensaxe para Gonzalo Caballero é que se poña de parte de Galicia e volva entender que é moi difícil tentar ser candidato á Xunta de Galicia se non defendes Galicia. Isto non llo dicimos nós, estanllo dicindo membros do PSOE", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.