Feridos un operario en Narón ao caer nunha obra e outro nas Somozas atrapado nunha máquina

Un home que traballaba nunha obra en Narón resultou ferido despois de caer dunha altura duns tres metros. Segundo os datos facilitados ao 112 Galicia, foi necesaria a intervención dos bombeiros da localidade, que colaboraron no traslado do operario á ambulancia.

Os feitos sucederon na rúa A Guarda, ao fío das 11,45 horas. Nese momento, un particular alertou ao 112 Galicia do ocorrido. Acto seguido, o servizo de emerxencias puxo tamén a situación en coñecemento de Urxencias Sanitarias de Galicia-061, da Policía Nacional, da Policía Local e de Protección Civil.

Finalmente, o traballador ferido foi trasladado a un centro hospitalario.

OPERARIO ATRAPADO NAS SOMOZAS

Tamén esta tarde, sobre as 17,30 horas, o 112 Galicia recibía a chamada dun particular que informaba doutro operario ferido en Seixas, no concello coruñés das Somozas.

O accidente ocorreu no mesmo recinto da empresa para a que traballa o home. Segundo informou o alertante, o traballador sufriu unha caída coa máquina que conducía e quedou atrapado no seu interior.

Ata o lugar desprazáronse ademais dos profesionais sanitarios, os Bombeiros do Eume, que excarceraron ao traballador ferido. Unha vez liberado, foi trasladado en ambulancia ata o centro hospitalario de referencia.

A Garda Civil e os membros do GES de Ortigueira tamén foron informados do suceso polo 112 Galicia.

Traballadores de ambulancias do 061 | Fonte: xunta.gal