Pontevedra salvará 14 gansos do Nilo, a pesar de ser unha especie invasora moi agresiva

O concelleiro Iván Puentes asegura que ningunha das 14 aves serán sacrificadas e serán remitidas a un novo fogar.

Por Galicia Confidencial | Pontevedra | 15/06/2020 | Actualizada ás 21:24

Comparte esta noticia

Os 14 gansos do Nilo, unha especie invasora, que se atopan nos espazos naturais de Pontevedra, principalmente na Xunqueira de Alba, non serán sacrificadas. Así o anunciou o edil de Desenvolvemento Sostible do Concello de Pontevedra, o socialista Iván Puentes, que suliñou que serán enviadas ao  centro zoolóxico ornitolóxico Avifauna, situado no municipio lucense de Outeiro de Rei.

Gansos do Nilo, unhas especie invasora que se atopa nos espazos naturais galegos
Gansos do Nilo, unhas especie invasora que se atopa nos espazos naturais galegos | Fonte: Concello de Pontevedra

Puentes recibiu durante a fin de semana a confirmación de que Avifauna acollerá estas aves que retirará a empresa Larus Control dos espazos naturais de Pontevedra. O edil socialista agradeceu a boa disposición do Servizo de Conservación da Natureza da Xunta, “que xa está a realizar as xestións para que as aves exóticas poidan ser trasladadas a este parque de conservación da natureza”. 

“Avifauna asegura que ten capacidade para todos eles nas súas instalacións, polo que, tal e como avanzamos, estarán nas mellores condicións posibles”, sinalou. Ao mesmo tempo, lembrou que foi o Servizo de Patrimonio Natural da Xunta o que instou en marzo ao Concello a eliminar esta especie invasora, “moi perigosa para a subsistencia doutras autóctonas”, e que existen unha serie de instrucións e directivas europeas, estatais e autonómicas “que o Goberno municipal comparte e que obrigan a retirar estes exemplares dos ríos de toda Europa”. 

“Son unha especie exótica e invasora -insiste-, especialmente territorial, e que, ao igual que outras especies invasoras como a velutina ou o cangrexo americano que temos na Xunqueira de Alba, están a destruír os ecosistemas propios de Galicia e a aniquilar outras especies autóctonas como os patos do país, que habitualmente vemos nos nosos ríos”, dixo.

Así, destacou que os controis se realizan “para evitar que se sigan estendendo e que teñamos aquí os problemas que xa se están a producir no Norte e no Centro de Europa (a súa taxa de crecemento anual sitúase en Holanda nun 28% dende o seu establecemento nas zonas silvestres en 1999)”.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta