Casado minimiza o brote da Mariña e chama a exercer o voto: "É máis seguro ca tomar un café nun bar"

O líder do PP, Pablo Casado, pediu "tranquilidade" este luns e chamou a exercer o voto na comarca lucense da Mariña despois de que a Xunta decretase o seu confinamento durante cinco días por un brote de coronavirus. Segundo subliñou, é "máis seguro" ir votar o 12 de xullo a un colexio electoral, no que se cumprirán todas as medidas de seguridade, que tomarse un café "nun bar concorrido".

Nunha entrevista en Antena 3, que recolleu Europa Press, Casado afirmou que Alberto Núñez Feijóo realizou unha xestión "moi eficaz" durante a pandemia e engadiu que, a diferenza do ocorrido a nivel nacional, en Galicia "cumpriuse o que recomendan os expertos", con prevención e escoitando as alertas; "protección" con medios e máscaras; e "intervención" con test masivos e "confinando a poboacións de risco".

Despois de que o BNG pida suspender as eleccións nesta comarca de Lugo e os socialistas aseguren que Feijóo actuou tarde, Casado lanzou "unha mensaxe de tranquilidade". "É máis seguro ir votar a un colexio electoral no que se van respectar as distancias e todo o mundo vai ir con protección, que ir por exemplo a tomar un café a un bar que estea máis concorrido", manifestou.

FEIJÓO, "O MÁIS PREVISOR"

O líder do PP subliñou que Feijóo foi "o máis previsor" ante a Covid-19 en relación con outras administracións e sinalou que nos "picos da pandemia" fixo test masivos, limitou a mobilidade e medicalizó os consultorios rurais e as residencias de anciáns. "Iso permitiu que Galicia teña unha taxa de mortalidade e contaxios moito menor que a media nacional", apostilou.

Ademais, lembrou que Feijóo foi no seu día presidente de Insalud e, por tanto, é unha persoa con "formación" en xestión sanitaria. "Teño plena confianza pero sobre todo pido tranquilidade para que a xente exerza o voto. Non se poden suspender as eleccións nun só territorio", resaltou.

Neste punto, indicou que na oposición viu un "remexido de 10 partidos" e engadiu que o que ve é que "non vai gañar e tenta culpar a Feijóo das medidas sanitarias, que nada ten que ver coas eleccións". "Xamais o PP e Alberto Núñez Feijóo tomaría ningunha decisión en contra da seguridade dos seus paisanos se non estivese plenamente seguro de que van poder exercer o voto con total seguridade o domingo", salientou.

Ademais, Casado afirmou que o confinamento da Mariña demostra que o PP "tiña razón" e que "había plan b xurídico" que permite confinar poboacións determinadas, a pesar de que o Goberno de Pedro Sánchez estivo "tres meses en estado de alarma dicindo que non era posible". "Pois si, pódese confinar con plenas garantías xurídicas e sen ter un shock económico como o que sufriu España", abundou.

"FEIJÓO É SINÓNIMO DE PP"

Ante o feito de que se acuse a Feijóo de esconder as siglas do PP, Casado indicou que este tipo de debates sempre están presentes cando hai cita coas urnas e resaltou que Feijóo "é sinónimo de PP e sinónimo de Galicia".

"E estes debates sobre as siglas ou non siglas son os mesmos que se facían con Fraga e Aznar e con Feijóo e Rajoy", abundou, para engadir despois que as eleccións galegas "sempre foron antesala de bos resultados a nivel nacional" como ocorreu en 1981 con Gerardo Fernández Albor, en 1993 con Manuel Fraga ou en 2009 con Feijóo.

Preguntado expresamente se Feijóo lle pediu baixar o ton en campaña, Casado rexeitouno e asegurou que "ao final un partido ten que ser unha orquestra na que hai distintos instrumentos", algo que, ao seu xuízo, ocorre tamén no seo do PSOE e mesmo "en cousas nucleares". "O PP, no nuclear e o fundamental estamos completamente de acordo como unidade nacional, seguridade, pensións garantidas, baixadas de impostos...", apostilou.

O presidente do PP sinalou a continuación que Álvarez de Toledo é portavoz parlamentaria e ten "maior confrontación" co Goberno. Ao seu entender, nun nivel autonómico hai que ter unha relación "máis institucional". "Somos un partido de estado e demostrámolo na crise do coronavirus", proclamou.

O presidente da Xunta, Alberto Núñez Feijóo, e o presidente do PP, Pablo Casado, durante a presentación de candidaturas do PP en Galicia para os comicios do 12 de xullo. En Santiago de Compostela, a 21 de xuño de 2020.. Álvaro Ballesteros - Europa Press | Fonte: Europa Press