Aumentan a 227 os casos de COVID entre usuarios e traballadores de residencias de maiores en Galicia
O xeriátrico do Incio segue como principal foco, con 87 usuarios e 31 traballadores contaxiados
Por Europa Press / Redacción | Compostela | 03/09/2020 | Actualizada ás 14:48
Os contaxios de 4 usuarios e 4 traballadores máis elevaron a 227 os casos activos de COVID en residencias de maiores de Galicia, e o centro xeriátrico do Incio segue sendo o máis afectado, segundo trasladaron fontes da consellería de Política Social.
Así, nas últimas horas confirmáronse os casos positivos de 3 usuarios da residencia DomusVi de Outeiro de Rei e dun usuario da residencia de Oleiros. Así mesmo, á listaxe de casos positivos sumáronse un traballador da residencia A Saleta de Cea, outro da residencia Vitoria de Teo, outro de Saraiva Sénior de Pontevedra, e outro de Alvi Beade (Vigo).
Deste xeito, o número de usuarios contaxiados ascende a 166, mentres que o número de traballadores con COVID pasou de 57 a 61. Así mesmo, notificouse un novo falecemento nunha residencia: trátase dunha persoa que morreu nas últimas horas no centro Orpea de Culleredo.
Desde o inicio da pandemia, e do total de falecidos con COVID en Galicia (651), hai 286 persoas vinculadas con centros residenciais (136 morreron dentro dos propios xeriátricos e outras 150 faleceron en hospitais e residencias integradas).
A residencia do Incio mantense como a que concentra máis casos, con 87 maiores contaxiados; seguida pola residencia DomusVi de Outeiro de Rei, con 42 casos; e polo centro Orpea de Culleredo, con 32 casos. Tamén hai usuarios con COVID na residencia DomusVi Lalín (4 casos) e en Oleiros (un caso).
TRABALLADORES DE RESIDENCIAS
No caso dos traballadores, hai 31 casos na residencia do Incio, 6 empregados afectados en Orpea de Culleredo, 5 en DomusVi de Outeiro de Rei e outros 4 en DomusVi Lalín.
A eles súmase un caso entre o persoal de cada un dos seguintes centros xeriátricos: residencia de Oleiros, DomusVi Coruña (Oleiros), Volta do Castro (Santiago), Vitoria (Teo), Os Terzos (Touro), DomusVi Monforte, residencia de maiores San Bartolomeu (Xove), Nosa Señora do Socorro (Arnoia), A Saleta (Cea), DomusVi Barra de Miño (Coles), residencia Santiago Apóstolo (Vilamarín), Fogar Residencial Vilar de Barrio, CRAPD II de Vigo, Sariva Sénior e residencia Alvi-Beade (Vigo).
Finalmente, con respecto aos centros de discapacitados, mantéñense sen cambios os casos de COVID: dous usuarios da residencia Ricardo Baro de Aspronaga (Oleiros); un traballador desa mesma residencia; un empregado da residencia de atención a discapacidade da Braña (A Estrada); e un da residencia As Flores (Ourense).
CASOS
Por outra banda, o número de pacientes con COVID-19 hospitalizados subiu a 174 --catro máis que onte-- este xoves en Galicia e 15 deles --un máis que onte-- atópanse na UCI, de acordo cos datos do sete áreas sanitarias.
