A ponte levanta os ánimos ao sector hostaleiro: "houbo moito mellores resultados do esperado"
A Xunta di que Galicia estase a consolidar como "destino seguro".
Por Europa Press / Redacción | SANTIAGO DE COMPOSTELA | 13/10/2020 | Actualizada ás 13:30
Os aloxamentos galegos rexistraron durante esta ponte do Pilar resultados "moito mellores do esperado", con cifras que chegaron ao cheo completo nalgúns hoteis e en certas zonas.
Así o explicou o presidente do Clúster Turismo de Galicia, Cesáreo Pardal, que admitiu que, a falta dos datos concretos, "as sensacións foron moi boas". Pardal lembrou que o sector viña "dun momento moi delicado" e que, a pesar das circunstancias, os resultados "foron mellores do esperado". Así, destacou, "algúns destinos turísticos tiveron mesmo o 100 por cen nalgúns hoteis" e ámbitos como o turismo rural rexistraron bos resultados.
En canto ás áreas, "zonas como a Ribeira Sacra, que ten un tirón tremendo, volveu marcar a diferenza con respecto a outras", así como a Costa da Morte.
En relación ao Camiño de Santiago, Cesáreo Pardal apuntou que as cifras "non son as do ano pasado" e, aínda que "si hai peregrinos", non é "o número que todos desexariamos". No entanto, o presidente do Clúster augurou que "isto vai ir aos poucos" e apostou por "seguir demostrando que Galicia é un destino seguro".
UNHA PONTE "ESTRAÑA"
Na mesma liña, o vicepresidente da Xunta, Alfonso Rueda, asegurou que o balance desta "ponte estraña" non é negativo, sobre todo tendo en conta "o contexto e as expectativas", exceptuando só aquelas zonas con restricións.
"Con respecto á visita de turistas e ao movemento tanto da propia comunidade autónoma como das comunidades autónomas limítrofes, foi unha experiencia bastante boa", dixo o vicepresidente, que cre que o turismo volveu a elixir "máis natureza" e unha área "sen masificacións". "Galicia está a consolidarse como destino seguro", resolveu.
