Prisión sen fianza por asasinato para o detido polo crime de Oza-Cesuras

O Xulgado de Instrución número 2 de Betanzos acordou prisión provisional comunicada e sen fianza para o detido polo crime de Oza-Cesuras, un veciño de Culleredo de 51 anos. Faino investigado polos delitos de asasinato e tenencia ilícita de armas.

Así o informou o Tribunal Superior de Xustiza de Galicia (TSXG) despois de que este martes pasasase a disposición xudicial. Fíxoo por videconferencia ao atoparse ingresado no Complexo Hospitalario Universitario da Coruña (Chuac).

A este hospital foi trasladado tras sufrir un infarto, así como por lesións nun pé, segundo informou a Garda Civil. Desde o Instituto Armado sinalouse que a parada cardiorrespiratoria sufriuna ao ser localizado polos axentes agochado nunhas matogueiras e con manchas de sangue na roupa.

Para o caso de que fose posto en liberdade, a xuíza acordou tamén unha orde de afastamento con respecto ao marido e a filla da vítima, unha muller de 33 anos, que coñecía ao presunto autor dos feitos, segundo informou a Benemérita.

O aviso do sucedido recibiuse sobre as 19,05 horas do pasado venres, en concreto na vivenda sita en Vilar de Costoia, Porzomillo, en Oza-Cesuras. A muller apareceu morta no seu domicilio, aínda que antes berrou para pedir axuda, cando se atopaba co presunto autor na leira da vivenda.

A partir de aí tivo lugar a secuencia de feitos que finalizou co falecemento da muller, que recibiu un disparo, e a fuxida do presunto autor, segundo explicou a Benemérita, que investiga as causas do suceso e que descartou a hipótese do roubo.