Traballadores da Deputación de Ourense "acumulan meses" sen cobrar a suba salarial de 2021, denuncia o PSOE

O PSOE de Ourense denunciou que os traballadores da Deputación provincial acumulan catro meses sen cobrar nas súas nóminas a subida salarial do 0,9% que lles corresponde neste 2021 por culpa da "propaganda, o autobombo e a inoperancia" do presidente provincial, Manuel Baltar".

"O persoal, unha vez máis, está a ser vítima do xogo político dun presidente que usa a institución provincial como o seu xoguete", aseguran os socialistas nun comunicado remitido aos medios, no reclaman "solucións inmediatas".

O PSOE provincial argumenta que este "vergoñoso carrusel de atrasos" está a ser causado porque o presidente aprobou en setembro de 2020 "ás présas e sen previsión", os orzamentos do presente exercicio coa "única intención de publicitar que era o primeiro de España" en aprobalos.

Respecto diso, o viceportavoz dos socialistas, Nacho Gómez, denuncia que "isto provocou que a programación económica das contas sexa unha fábula contable que ten que corrixir mes tras mes mediante grandes modificacións de crédito", a última o pasado mes de marzo por importe de 20 millóns.

Entre esa "falta de previsión" tamén se inclúe a ausencia de dotación económica suficiente para pagar as nóminas de acordo coa actualización que establecen os orzamentos xerais do Estado para todo o persoal ao servizo das administracións públicas. "Baltar se emenda a si mesmo e en catro meses xa precisou catro modificacións orzamentarias multimillonarias para arranxar as contas públicas", destaca o deputado.

"Os caprichos de autobombo de Baltar están a provocar trastornos nas economías de centos de empregados e empregadas da Deputación", sinala o socialista, que sostén que "moitas familias planifican o seu futuro en base ás nóminas e xa acumulan moitos meses de atrasos e incertezas no medio da pandemia". Por todo iso, esixe a Baltar unha "rectificación inmediata" e o abono dos atrasos que debe. "O contrario é profundar nunha gran irresponsabilidade", apuntou.

RESPOSTA DO PP

Respecto diso, noutro comunicado remitido aos medios, o portavoz do grupo provincial do PP e vicepresidente terceiro da Deputación, Plácido Álvarez Dobaño, acusou ao viceportavoz socialista de "utilizar a demagoxia solicitando a subida salarial para os traballadores" da institución cando, en realidade, o que quere é "pedir para el un aumento de soldo".

O portavoz popular asegura que Nacho Gómez é a "persoa en nómina de toda a Deputación que menos traballa" xa que "non pisa o pazo provincial en todo o mes e o único que fai é conectarse telematicamente o tempo que dura o pleno mensual para desprestixiar a Ourense".

Ademais, o PP acúsao de facer gala "unha vez máis" da súa "ignorancia" xa que a subida salarial si está consignada nos orzamentos para 2021. "Utiliza o mal momento que están a pasar as persoas pola pandemia sendo o deputado que mantén un recurso contra as axudas a autónomos e empresarios da provincia", asegura o popular, que considera que "o que debería de facer é pedir que se retire ese recurso".

Plácido Álvarez descartou que "polo momento" a institución provincial vaia a aplicar a subida ao asegurar que, "en momentos de tanta gravidade social, as prioridades do goberno provincial son outras". Con todo, sinala que "non se descarta estudar a posible subida no futuro, que tería carácter retroactivo, polo que non ocasiona prexuízo".

O portavoz do PSOE de Ourense, Rafael Rodríguez Villarino. PSOE OURENSE - Arquivo