A suba de casos nas escolas provoca que se dupliquen os peches nas aulas

O número de positivos aumentou en 23 persoas e as clases cerradas son máis do dobre respecto á última xornada lectiva.

Por Europa Press / Redacción | SANTIAGO DE COMPOSTELA | 13/04/2021 | Actualizada ás 13:48

Comparte esta noticia

Os casos activos de Covid-19 en centros educativos de Galicia --escolas infantís e ensino non universitario-- ascenderon a 407, o que supón 23 máis que a última xornada lectiva da semana pasada --en relación aos últimos datos actualizados o sábado--, e soben a nove as aulas pechadas --cinco máis--.

Segundo datos actualizados este martes pola Xunta, tras arrincar as clases despois das vacacións de Semana Santa sen aulas nin centros pechados, na actualidade hai nove clases inoperativas por positivos, dúas delas nun mesmo centro de Ribeira da área de Santiago. Por áreas sanitarias, os casos activos descenden nas da Coruña e Vigo, mentres que soben nas de Ferrol, Lugo, Ourense, Pontevedra  e Santiago.

Á cabeza mantense a da Coruña, con 115 casos activos en centros educativos, o que supón dous menos, co IES Afonso X o Sabio de Cambre co maior número, oito. Conta cunha aula pechada no CPR Plurilingüe Escravas Sacro Corazón de Jesús da cidade herculina por un positivo.

Séguelle a de Vigo, con 111 infeccións activas, unha menos que a última xornada lectiva, co CPR plurilingüe Casa da Virxe de Cangas con máis casos, sete positivos. Nesta área segue unha clase pechada por un positivo no CPR Plurilingüe Alba.

Pola súa banda, na área de Pontevedra aumentan a 72 os casos activos en centros educativos, seis máis, co IES Monte da Vila do Grove co maior número de contaxiados, con seis positivos. Nesta hai, ademais, dúas aulas pechadas en senllas escolas infantís: unha no Grove e outra en Sanxenxo, ambas as cun positivo.

En canto á área de Santiago soben a 62 os casos activos, que supoñen 11 máis, e a catro as aulas pechadas, o que implica dúas máis. En concreto, as clases inoperativas localízanse na Escola Infantil de Silleda por un positivo; no CEIP Nosa Señora da Piedade de Vila de Cruces por unha infección; e no CEIP Plurilingüe de Palmeira en Ribeira, onde hai dúas clases pechadas por tres positivos.

Mentres, a de Ourense conta con 23 casos activos de Covid-19, cinco máis que a última xornada lectiva, e mantense sen clases pechadas por este coronavirus.

MENOS CASOS

Con menos casos en Galicia nos seus centros educativos sitúanse as áreas sanitarias de Lugo, cun total de 14 --tres máis--, e Ferrol, que conta con 10 --un máis--. Mentres que na de Ferrol non hai aulas pechadas, na de Lugo atópase inoperativa unha clase no CEIP Nosa Señora Purificación de Foz por un positivo.

Un grupo de nenos diríxese a entrar ao CEIP  Paradai, en Lugo / Carlos Castro - Europa Press - Arquivo. / Europa Press
Un grupo de nenos diríxese a entrar ao CEIP Paradai, en Lugo / Carlos Castro - Europa Press - Arquivo. / Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta