Acusan a Naturgy de "querer contaminar" un encoro da Limia para producir electricidade

Nova mobilización da plataforma ecoloxista Adega contra un proxecto industrial que ameazaría con danar o medio ambiente galego. Desta vez, as reivindicacións da asociación céntranse na Limia, unha zona baixo o punto de mira nos últimos anos polas denuncias de vertidos de puríns a masas de auga, cuestión xa recollida por Galicia Confidencial en ocasións anteriores.

Encoro das Conchas, na Limia, afectado por contaminación de bacterias | Fonte: Ecoloxistas en Acción

Con todo, desta vez a empresa obxecto de denuncia por parte do movemento ecoloxista non é Coren, senón Naturgy. Segundo apuntan dende a asociación con sede en Santiago de Compostela, a entidade pretendería unir dous encoros cunha central de bombeo soterrada; circunstancia que, á parte de danar zonas protexidas de distinto calibre, implicaría contaminar unha masa de auga en bo estado; sempre segundo denuncian dende Adega.

A cuestión estaría, precisamente, na unión deses dous encoros, que se produciría mediante a construción dunha central de bombeo soterrada. Dende Adega sosteñen que a operación implicaría reducir ao mínimo o caudal dos dous encoros “durante meses”, co prexuízo que iso implicaría para a fauna e flora das contornas, á parte de repartir “máis dun millón de metros cúbicos de entullos” na reserva da Biosfera Gerês-Xurés.

A problemática máis grave, porén, non estaría na eliminación de 153 hectáreas de hábitat --parte del protexido ou pendente de protexer--, senón nas consecuencias que a fusión destas dúas masas de auga tería para a que segue mantendo un “bo estado ecolóxico”: o encoro de Salas.  De levarse a cabo os plans da empresa, apuntan dende Adega, as augas de Salas veríanse mesturadas cos do encoro das Cunchas, sometido a unha elevada carga de cianobacterias como consecuencia dos vertidos de puríns de gando denunciados en reiteradas ocasións pola plataforma ecoloxista. 

DECISIÓN DO GOBERNO

Esta “barbaridade ambiental”, á parte, desenvolveríase de cara a que Naturgy --a antiga GN-FENOSA-- puidese continuar a explotar dúas concesións franquistas dos anos 40 até esgotar os seus 99 anos de vixencia. “É esta a nova economía verde?, cuestionan dende a asociación. Polo momento, o trámite está pendente do Goberno central, dado que a Xunta xa informou favorablemente do proxecto cando este se comezou a tramitar, hai uns 4 anos. Agora, a pelota está no tellado do MITECO, que terá que decidir se mantén a vixencia da declaración de impacto ambiental ou bota abaixo un proxecto que, de acordo co movemento ecoloxista, provocaría graves danos na contorna da Limia.