A Xunta autoriza megaconcertos e reabre todos os casinos e bingos en plena quinta onda
O aforo dos concertos será de entre 2.500 e 5.000 persoas sentadas. As salas de xogos esixirán PCR ou vacinación en nivel alto e extremo.
Por Europa Press / Redacción | SANTIAGO DE COMPOSTELA | 23/07/2021 | Actualizada ás 09:46
O Goberno galego autoriza a celebración de concertos en todos os concellos galegos, independentemente do nivel de contaxios covid que teñan, con público sentado que poderá ir dos 2.500 de aforamento para os que teñen máis restricións ata os 5.000 do nivel con menos incidencia acumulada. Neste caso, o grupo de concellos do nivel medio baixo, tamén poderán contar con espectáculos ao aire libre con público de pé, que non poderá superar o 33% da superficie útil do recinto e un máximo de 2.000 asistentes.
É unha das medidas recollidas no Diario Oficial de Galicia (DOG)-bis, publicado na noite do xoves, e que inclúe as novidades que entran en vigor cando se cumpran as 00,00 horas deste sábado. As únicas excepcións son os eventos contratados en establecementos de restauración para este fin de semana, tales como vodas, que poderán manter a previsión anterior ao 23 de xullo se o concello onde se vai a celebrar aumenta o nivel de restricións.
O DOG-bis, que trae como principal novidade a apertura dos establecementos de lecer nocturno nos concellos de máximas restricións con servizo só en terrazas, tamén aclara a normativa relativa aos espectáculos públicos ao aire libre, que desde o 25 de xuño experimentou distintos cambios e agora harmonízase "", como di a propia exposición de motivos.
Deste xeito, os concertos ou representacións ao aire libre só poderán realizarse con público de pé nos concellos co nivel máis baixo de incidencia actualmente en vigor, o medio baixo. As condicións son non superar o 33 por cento da superficie útil do recinto, de forma que cada persoa dispoña de tres metros cadrados, e o aforamento máximo será de 2.000 persoas.
Nos espectáculos musicais e artísticos con público sentado rexen dous tipos de aforamento. Nos concellos con restricións máximas e de nivel alto, un máximo de 2.500 persoas e un 50 por cento da capacidade permitida; mentres que nos de nivel medio e medio baixo, permítese un 75 por cento da capacidade permitida e un límite de 5.000 persoas.
REAPERTURA DE CASINOS E BINGOS
Xa na normativa do pasado 25 de xuño, permitíase a actividade de establecementos de xogo, azar, salas de bingo e salas recreativas nos concellos con menores incidencia, isto é, aqueles con nivel medio e medio baixo.
Coa nova normativa publicada este xoves 22 de xullo no DOG-BIS, agora tamén se permite a reapertura naqueles cunha incidencia máxima.
Concretamente, o diario oficial recolle que os casinos, salóns recreativos ou tómbolas poderán realizar a súa actividade sempre que non superen o 30 por cento da súa capacidade. Ademais, do mesmo xeito que a hostalaría neste nivel de incidencia, será obrigatorio presentar un certificado de vacinación, superación da enfermidade ou test negativo.
