Por Europa Press / Redacción | MADRID | 09/09/2021 | Actualizada ás 10:21
O Tribunal Constitucional (TC) previsiblemente declarará inconstitucional o segundo estado de alarma decretado polo Goberno de Pedro Sánchez en 2020 para facer fronte á pandemia de Covid-19, polo que atendería, aínda que sexa parcialmente, o recurso presentado polo partido político Vox, segundo avanza o diario ABC.
Tal e como explica este xornal, o maxistrado relator desta sentenza, Antonio Narváez, terminou a súa resolución e nela acollería dúas dos tres principais argumentos do partido de Santiago Abascal contra ese segundo período de estado de alarma que arrincou o 25 de outubro de 2020 e que se estendeu por seis meses. De ser así, este sería un novo revés para o Executivo que xa en xullo viu como o tribunal de garantías declaraba a inconstitucionalidade dalgúns aspectos do primeiro estado de alarma.
Neste recurso de inconstitucionalidade Vox sostiña que o segundo estado de alarma vulnera os artigos 17, 19, 21 e 25 da Constitución, relativos aos dereitos á liberdade e á seguridade; á libre circulación; á reunión e a manifestación pacíficas; e contra as sancións administrativas que directa ou subsidiariamente impliquen privación de liberdade.
Vox denunciou como inconstitucional a decisión do presidente do Goberno, Pedro Sánchez, de comparecer só cada dous meses ante o Pleno da Cámara para dar conta da súa evolución. Ese sería un dos aspectos que segundo ABC acollería o relator na súa resolución dado que se deu unha falta de control parlamentario ao Executivo.
Neste relatorio, previsiblemente o TC ditaminará que para cumprir coa esixencia constitucional de fiscalización do Executivo durante ese período de seis meses non foron suficientes as comparecencias ocasionais que fixo Sánchez no Congreso, e tampouco aquelas que delegou no que foi ministro de Sanidade Salvador Illa, e posteriormente Carolina Darias.
O segundo aspecto que reflectiría esa resolución ten que ver co nomeamento dos presidentes autonómicos como autoridade delegada, a denominada como cogobernanza. A xuízo de Vox isto xerou "un auténtico estado de desconcerto e caos" que abocou a unha situación de "inseguridade xurídica" aos cidadáns. Aínda que o próximo pleno do TC terá lugar a semana próxima, descoñécese polo momento a orde do día.
FEIJÓO CRE QUE É "RAZOABLE"
O presidente a Xunta, Alberto Núñez Feijóo, cre que sería "razoable" que o Tribunal Constitucional declare inconstitucional o segundo estado de alarma decretado polo Goberno no outono de 2020 para facer fronte á pandemia de covid-19.
En resposta a preguntas dos medios este xoves na rolda de prensa posterior ao Consello da Xunta, o mandatario autonómico ve "bastante coherente" que o TC emita un fallo desfavorable ao segundo estado de alarma como xa fixo co primeiro nunha resolución emitida no mes de xullo.
Este xoves, Feijóo manifestou que o tribunal aínda non emitiu un fallo pero, "con independencia" do que decida, a posible declaración como inconstitucional dos dous estados de alarma evidencia a ausencia de "leis con rango suficiente" para xestionar unha pandemia.
"O Goberno non xestionou a pandemia desde o punto de vista das súas competencias e deixou aos presidentes autonómicos abandonados desde o punto de vista legal. Isto é un feito", incidiu Núñez Feijóo, que sinalou ao ocorrido co pasaporte covid, rexeitado pola xustiza para a súa implantación en Galicia, como mostra dos "problemas" aos que se enfrontaron as comunidades.
Segundo Feijóo, desde o 'non' do TSXG á obrigatoriedade de presentar certificado covid para entrar en establecementos de hostalaría "incrementouse o número de contaXios" e perdeuse " forza" á hora de facer fronte á pandemia.
"Perdemos todos. A hostalaría, o lecer nocturno e a sociedade no seu conxunto. Só porque o Goberno central consideraba que non era necesario lexislar", censurou Feijóo, antes de lamentar que o Executivo "trate" ás comunidades "coma se fosen territorios independentes".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.