Por Europa Press / Redacción | SANTIAGO DE COMPOSTELA | 25/11/2021 | Actualizada ás 12:08
O grupo de investigación da USC Xenomas e Enfermidade no Centro de Investigación en Medicamento Molecular e Enfermidades Crónicas (CiMUS) achou datos xenómicos que poden axudar a diagnosticar o cancro hepático ata dúas décadas antes de que se manifeste.
Segundo informou a USC nun comunicado, o descubrimento, cuxos detalles foron publicados en 'Nature Communications', fíxose no marco dun consorcio internacional (Pan-Cancer) integrado por equipos de Inglaterra, Xapón e España, que utiliza avanzadas tecnoloxías de secuenciación do ADN para conseguir describir unha nova vía de formación de tumores como consecuencia da actividade do virus VHB, e o seu comportamento xenético, coa formación de tumores.
O avance, segundo expoñen os investigadores, "podería facilitar o diagnóstico precoz da enfermidade e axudar a deseñar estratexias terapéuticas máis eficaces". O catro por cento da poboación mundial está infectada polo virus da hepatite B (VHB), indican e o 20% dos e das enfermas "acabará morrendo por mor de cirrosis ou cancro de fígado, un dos poucos tipos tumorales cuxa taxa de mortalidade se prevé que siga aumentando no próximos dez anos", engaden. "Sábese que o cancro hepático se desenvolve habitualmente nun fígado enfermo, pero falta profundar en como é posible que unha infección por un virus poida derivar en cancro", sosteñen.
Desde hai décadas coñécese que, durante a infección, como parte do seu ciclo natural, VHB introduce o seu propio material xenético -o seu manual de instrucións- dentro das células do fígado humano. "Iso é o que lle permite seguir producindo copias de si mesmo e estender a infección. Este proceso, que é común a moitos outros virus, pode en ocasións finalizar coa integración do ADN de VHB dentro do ADN humano", sostén a primeira autora do artigo, Eva G. Álvarez. "Estas integracións do ADN do virus poden ser prexudiciais per se, pero por si soas non permitían explicar como VHB promove a formación de tumores", engade a investigadora.
NOVO FENÓMENO
Froito dunha investigación de varios anos e do traballo conxunto desde centros de Inglaterra, Xapón e España, "conseguiuse achegar certa luz a estas incógnitas", aseguran os investigadores deste grupo. Así, neste estudo, no que se abordaron 296 carcinomas de fígado, describiuse un "novo fenómeno", matizan, que "podería estar detrás do inicio e da progresión destes tumores".
"Utilizando tecnoloxías punteiras de secuenciación de ADN, comprobamos que, con frecuencia, as integracións do ADN do virus están a mediar alteracións no xenoma das células hepáticas. É dicir, no noso xenoma, adxacentes ao lugar en que se integra o ADN viral, vemos outro tipo de anomalías -como perdas do ADN nativo ou fusións entre cromosomas diferentes- que, en última instancia, fan que se perdan xenes protectores contra o cancro", explica a investigadora da USC e coautora do artigo, Paula Otero.
Por tanto, destacan que "sería a ausencia destes xenes, que en condicións normais evitan que as células se dividan sen control, a que podería estimular a formación do tumor". Para estes investigadores, un dos descubrimentos "máis sorprendentes" foi "poder demostrar que estes feitos ocorren de maneira moi temperá, ás veces mesmo dúas décadas antes de que se diagnostique o tumor", indican.
"Cremos que estes achados poderían facilitar o diagnóstico precoz da enfermidade, e tamén axudar a desenvolver estratexias terapéuticas máis eficaces", manifestou Paula Otero. As liñas de traballo deste grupo de investigación liderado polo profesor da USC José Tubío, tamén autor do artigo, manifestaron, "pasan no futuro por ir un paso máis aló e estudar a integración de VHB en tecidos pre-tumorales, é dicir, en fígados infectados por VHB nos que aínda non se desenvolveu o tumor".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.