Por E.P. | Santiago de Compostela | 26/11/2021 | Actualizada ás 17:24
A conselleira de Infraestruturas e Mobilidade, Ethel Vázquez, e o alcalde de Ferrol, Ángel Mato (PSOE), asinaron o convenio de colaboración para executar as obras de saneamento na marxe esquerda do río Sardiña, na zona de Serantes.
O Goberno galego, a través de Augas de Galicia, vai contratar e supervisar esta actuación e achegará o 70 por cento do importe, uns 630.000 euros, mentres que o Goberno local sufragará os 270.000 euros restantes.
O obxectivo é desenvolver as obras ao longo dos meses estivais de 2022, que é cando mellor se pode actuar na zona. En concreto, está prevista a instalación dun colector xeral, de 1.200 mm de diámetro e 574 metros de longo, ademais de 13 pozos, desde a ponte da estrada da Malata ata as proximidades do Estadio Municipal da Malata.
Vázquez explicou que o obxectivo é "solucionar as graves deficiencias que presenta esta rede de saneamento", que presenta "problemas de capacidade, roturas, infiltracións" e "verteduras incontroladas ao río e á súa contorna". "Estas obras completan as finalizadas a comezos deste ano, a última das grandes planificadas para mellorar a calidade das augas da ría de Ferrol", resolveu.
Pola súa banda, o alcalde de Ferrol, agradeceu a colaboración da Xunta á hora de poder executar estes traballos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.